loftslagsmál.

Virðulegur forseti. Hvernig ætlar Ísland að ná trúverðugleika með aðgerðum sínum í loftslagsmálum? Við eigum fyrst og fremst að horfa á þau tækifæri sem felast í aukinni verðmætasköpun samhliða því að ná markmiðum okkar í loftslagsmálum, tækifæri sem styðja við uppbyggingu og grunn undir velferðarsamfélagi. Tækifæri Íslands eru mýmörg og öfundsverð þegar horft er til okkar frá öðrum löndum. Hægt er að nefna skógrækt og endurheimt votlendis, sem er klassískt, og orkuskipti í samgöngum þar sem við eigum alveg gríðarleg tækifæri, við eigum að geta gengið miklu hraðar til þeirra verka en margar aðrar þjóðir með endurnýjanlegum orkugjöfum. Það á við varðandi bíla, skipaflota og flugvélar.

Orkutengd atvinnustarfsemi er nokkuð sem við höfum alveg óþrjótandi möguleika á að byggja upp í landinu; útflutningur á raforku og eldsneyti, gagnaver, aukin matvælaframleiðsla, allt byggt á endurnýjanlegum orkugjöfum. Þarna eigum við gríðarlega mikil tækifæri og við eigum að horfa til þess sem t.d. Danir eru að gera, sem ætla að tvöfalda raforkuframleiðslu sína fyrir árið 2030 með útflutning á endurnýjanlegum orkugjöfum, raforku og eldsneyti í huga. Við eigum að ryðja úr vegi hindrunum fyrir slíkri atvinnustarfsemi til að byggja upp í landinu. Það fer saman við það að auka orkuöryggi þjóðarinnar.

Virðulegur forseti. Það á ekki að kalla á aukin útgjöld úr ríkissjóði fyrir okkur Íslendinga að ná markmiðum okkar í loftslagsmálum. Það á ekki að þurfa að kalla á aukna skattheimtu. Við eigum miklu frekar að ná þeim með aukinni verðmætasköpun og við eigum að líta á þetta sem tækifæri til aukinnar verðmætasköpunar í kolefnisfríum atvinnuvegum og stórstígum skrefum í orkuskiptum.