kjaramál flugvirkja Landhelgisgæslu Íslands.
Herra forseti. Bara svo það sé alveg skýrt þá var það ekki ég sem fór að ræða um kaup og kjör hjúkrunarfræðinga og flugvirkja Landhelgisgæslunnar. (Gripið fram í.) Fólk á rétt á að semja um kaup sitt og kjör og mér finnst mjög slæmt að Alþingi ætli að grípa fram fyrir þann rétt. Ég hef sagt það í hvert einasta skipti sem þessi ríkisstjórn hefur ákveðið að setja lög á réttindi fólks til að semja. (Gripið fram í.) — Kannski ekki þennan hóp. En það hefur verið gert. (Gripið fram í.) Við verðum að horfa á staðreyndirnar. Staðreyndirnar eru að fólk hefur þennan rétt til semja. Hjúkrunarfræðingar eru kannski hópur sem erfitt er að tala um núna vegna þess að þeir hafa haldið lífinu í mörgum hér á landi og gera það reyndar alltaf, en sérstaklega í gegnum þennan heimsfaraldur. Samt voru þeir í raun skikkaðir til og þurftu að sætta sig við að vera ekki með góðan samning heldur bara einhvern dóm.
Ég held að það sé eitthvað að í allri kjaraumræðu á Íslandi fyrst við lendum í þessu trekk í trekk. Ég átta mig ekki á því á hvaða vegferð við erum ef við þurfum að koma hingað saman á föstudegi á neyðarþingfundi, svo að segja, til að taka af fólki samningsrétt þess. Mér finnst það ljótt.