störf þingsins.

Virðulegi forseti. Nú liggur fyrir nýtt hættumat fyrir Flateyri. Í því kemur fram að 30 hús, 30 heimili, eru á hættusvæði fyrir snjóflóðum. Samkvæmt hættumati frá árinu 2004 voru engin hús á hættusvæði C eftir að varnargarðarnir voru reistir fyrir ofan bæinn. Það voru mikil vonbrigði þegar í ljós kom að þeir varnargarðar sem reistir voru eftir snjóflóðin árið 1995 skyldu ekki reynast það öryggi sem fólk taldi sig búa við. Þar er gert ráð fyrir því að yfirflæðið og snjódýptin eftir snjóflóð gætu orðið meiri en gert var ráð fyrir við hönnun stoðvirkja á svæðinu. Enn liggur ekki fyrir niðurstaða áhættumats á Ísafirði, Bíldudal, Siglufirði, Ólafsfirði og Neskaupstað, en þar gæti niðurstaðan reynst sambærileg.

Árið 1995 var örlagaríkt ár í náttúruhamfarasögu þessa lands, 35 manns létust í snjóflóðum á Vestfjörðum. Þessi dagur situr fastur í minningu Vestfirðinga sem og víðar. Í kjölfarið lá fyrir brýn þörf fyrir fullkomna varnargarða þar og á sambærilegum stöðum. Nú í janúar síðastliðinn urðu tvö snjóflóð á Flateyri og það þriðja á Súgandafirði og þeim fylgdi mikil eyðilegging. Það kom í ljós að varnargarðarnir sem höfðu verið reistir stóðu ekki undir væntingum. Enn hafa ekki verið efnd áratugagömul loforð til Vestfirðinga. Nú kemur aftur í ljós að hætta á rýmingarsvæðinu er stærri en áður var talið og nær nú langt inn í byggðina. Nú hlýtur neyðin að vera öllum ljós. Auk þess eru atvinnumannvirki ekki varin.

Við megum ekki sofna aftur á verðinum. Við megum ekki telja aura þegar lifibrauð manna eða jafnvel mannslíf geta verið í húfi. Á þessum svæðum búa einstaklingar sem verða að geta treyst á það að stoðvirkin haldi þegar á reynir. Við verðum að geta tryggt öryggi þeirra og það strax. Nógu margar eru þær áskoranir sem við búum við á þessum svæðum nú þegar. Klárum þetta verkefni sem legið hefur fyrir síðan 1995.