staðfesting ríkisreiknings 2019 .

Frú forseti. Ég þakka hv. þm. Birni Leví Gunnarssyni fyrir mjög áhugaverðar hugleiðingar um vinnu fjárlaganefndar. Þegar við ræðum árangurinn af þeim fjármunum sem við setjum í hina ýmsu þætti í ríkisrekstrinum eigum við að sjálfsögðu að velta því fyrir okkur hvort verið sé að nýta fjármunina með skynsamlegum hætti og hvaða árangri það skili. Ég held að þá vinnu mætti inna af hendi með mun skilvirkari hætti en nú er gert.

Ég tek undir það með hv. þingmanni að við höfum lítið farið í saumana á þeim ríkisreikningi sem við ræðum í þessu frumvarpi. Hv. þingmaður nefndi Covid, veirufaraldurinn, hvort það væri kannski ástæðan. Þess heldur held ég að mikilvægt sé að fara mjög vandlega yfir það sem gerðist í þessu ferli. Við sjáum, eins og ég rakti áðan, að á seinni hluta ársins 2018 til 2019 varð niðursveifla og það er ekkert gert með það. Boginn er bara spenntur til hins ýtrasta og útgjöldin verða þeim mun meiri. Síðan átta menn sig á því að það er gríðarlegt vanmat á tekjum og það þarf að fá fjáraukalög til að bæta það upp. Þá komum við aftur að þessu skemmtilega umræðuefni sem hv. þingmaður nefndi hér áðan, við getum eytt miklum tíma í að ræða útgjöld sem eiga ekkert heima í fjárauka. Ég get komið nánar inn á það á eftir. En ég tek heils hugar undir það með hv. þingmanni að það hefði átt að gefa miklu meiri tíma í þessa vinnu. Það er hlutverk fjárlaganefndar að stuðla að ráðdeildarsemi í fjármálum ríkisins. Þess vegna á nefndin að fara vandlega yfir vinnu sína og skoða hver árangurinn er.