norðurskautsmál 2020.

Herra forseti. Ég vil byrja á að þakka hv. þm. Ara Trausta Guðmundssyni fyrir yfirferð yfir skýrslu Íslandsdeildar þingmannaráðstefnu um norðurskautsmál fyrir árið 2020. Við sem erum í alþjóðastarfi upplifum kannski fjarfundina undanfarið ár með ákveðnum hætti. Það er erfitt að halda þessa risastóru fundi, eins og í NATO-þinginu, sem fjarfundi en nefndarfundirnir sem hafa verið í fjarfundum hafa bara gengið nokkuð vel.

Þetta er eitt af því sem langar að spyrja hv. þingmann um vegna þess að það er erfitt landfræðilegt svæði sem við fjöllum um þegar við tölum um norðurskautsmálin. Þessi lönd og íbúarnir eru oft þannig staðsettir landfræðilega að erfitt er að stunda ferðalög og langt að fara.

Síðan langaði mig að koma aðeins inn á stefnu Íslands í sambandi við Norðurskautsráðið, Saman til sjálfbærni á norðurslóðum. Þar vorum við Íslendingar með þrjú málefnasvið sem áhersla var lögð á; málefni hafsins, loftslagsmál og grænar orkulausnir. Hvernig hefur umræðan verið í þingmannanefndinni eins og varðandi hafið? Þá er ég að tala um súrnun hafsins og annað. Hefur þessi umræða verið lifandi og stór? Síðan aftur það sem snýr kannski að aðaláhuga mínum, þ.e. orkumálunum og endurnýjanlegri grænni orku. Lengi hefur verið talað um vindorkuna á norðurslóðum sem kannski einna helstu og beinustu leiðina til að orkuskipti geti farið þar fram en maður heyrir ekki mikið af umræðunni almennt. Mig langaði því að fá þetta frá innanbúðarmanni. Hv. þingmaður hefur verið mjög duglegur í þessu starfi undanfarin ár og væri þá fróðlegt að heyra hvar þessi mál standa. Hver er umræðan um orkuskiptin og endurnýjanlega orkugjafa?