kvikmyndaiðnaðurinn.

Frú forseti. Í ljósi þeirrar stöðu sem komin er upp hér á landi í ferðamannaiðnaðinum og kvikmyndaiðnaðinum vegna Covid-19 og gríðarlega hertra aðgerða á landamærunum hafa komið fram hugmyndir um hvernig hægt sé að bjarga því sem bjargað verður hvað þessar iðngreinar varðar. Við höfum séð fjölda hópuppsagna hérlendis vegna heimsfaraldursins og atvinnuleysi eykst gríðarlega. Mjög brýnt er að fjölga atvinnutækifærum strax. Það eru gríðarleg tækifæri í stöðunni sem upp er komin, sér í lagi hvað varðar komu erlendra kvikmynda- og sjónvarpsframleiðenda. Ísland stendur nú frammi fyrir tækifærum sem aldrei fyrr til að laða að erlenda framleiðendur og erlend stórverkefni, þökk sé árangri þjóðarinnar í sóttvörnum.

Hæstv. sveitarstjórnar- og samgönguráðherra sagði í lok síðasta árs að tækifæri fælust í því að styðja enn frekar við kvikmyndagerð í landinu og hækka endurgreiðslur af framleiðslukostnaði í 35% úr 25%. Nýlega lagði hæstv. mennta- og menningarmálaráðherra fram nýja langtímakvikmyndastefnu fyrir Ísland. Í henni er miðað að því að gera kvikmyndaframleiðslu að fjórðu stoð íslensks efnahagslífs. Ljóst er að ferðaiðnaðurinn verður áfram í lamasessi vegna Covid-19 og atvinnuleysi heldur áfram að aukast með tilheyrandi kostnaði fyrir ríkissjóð. Erlend kvikmyndaverkefni gætu fært ríkissjóði stórfé og skapað fjöldamörg störf á stuttum tíma.

Ég vil spyrja: Telur hæstv. ráðherra ekki mikilvægt að ráðuneyti hennar taki þátt í að styðja við að skapa störf sem þessi sem myndu hafa uppbyggileg áhrif á ferðaþjónustuna og telur hún ekki rökrétt að fylgja eftir nýju flottu kvikmyndastefnu hæstv. menntamálaráðherra með þessum hætti? (Forseti hringir.) Það eru gríðarleg sóknarfæri í þessu. Við erum að tala um milljarða sem koma inn í hagkerfið og streyma hér um áður en til nokkurrar endurgreiðslu kæmi.