151. löggjafarþing — 62. fundur,  3. mars 2021.

störf þingsins.

[13:03]
Horfa

Björn Leví Gunnarsson (P):

Forseti. Varðandi skriflegar fyrirspurnir til ráðherra þá tók ég saman í mars í fyrra fjölda fyrirspurna til ráðherra og reiknaði meðalsvartíma fyrirspurnanna, sem voru þá 34 dagar að meðaltali fyrir hverja fyrirspurn. Alls hafði þá 172 fyrirspurnum verið svarað fyrir nákvæmlega ári síðan. Í dag hefur 130 fyrirspurnum verið svarað, mun færri en á sama tíma í fyrra, en svartíminn er mjög svipaður, 32 dagar að meðaltali. Þó að 37% fleiri fyrirspurnum hafi verið svarað á sama tíma í fyrra hefur svartíminn ekkert styst. Þeir ráðherrar sem eru einna lengst að svara nú í ár eru fjármála- og efnahagsráðherra, en meðalsvartíminn er 51 dagur fyrir þær 12 fyrirspurnir sem hann hefur svarað það sem af er þessu þingi. Meðalsvartími hjá hæstv. mennta- og menningarmálaráðherra eru 45 dagar fyrir 11 fyrirspurnir.

Nú er stjórnskipunar- og eftirlitsnefnd með mál til umfjöllunar þar sem fjallað er um að auka fjölda daganna sem hafa má til að svara skriflegum fyrirspurnum upp í 25 og sem stendur eru einungis fimm ráðherrar á þeim mörkum. Hæstv. ferðamála, iðnaðar- og nýsköpunarráðherra var með 25 daga svartíma fyrir fjórar fyrirspurnir á þessu þingi. Ef tekið væri tillit til ósvaraðra fyrirspurna myndi það fara yfir 25 daga. Hæstv. samgöngu- og sveitarstjórnarráðherra er með 23 daga svartíma að meðaltali fyrir níu fyrirspurnir en hæstv. heilbrigðisráðherra hefur verið fljótust ráðherra að svara, hún hefur svarað 19 fyrirspurnum á 22 dögum að meðaltali. Þrátt fyrir fækkun fyrirspurna, m.a. út af Covid og minni vinnu þar í kring, þá hefur meðalsvartími ekki styst. Þannig að maður veltir fyrir sér hvort tilefni sé til að auka þá tímalengd sem ráðuneyti og ráðherra hafa til að svara eða hvort það þarf önnur mál.