fjármálaáætlun 2022--2026.

Herra forseti. Ég þakka hv. þingmanni fyrir góða fyrirspurn. Það er mjög erfitt að byggja áætlanagerð á ólíkri virkni bóluefna. Við ákváðum að fara í alþjóðlegt samstarf um að afla bóluefna vegna þess að okkur fannst mikilvægt að eiga ekki allt okkar undir einum framleiðanda, það væri mikilvægt að veðja á fleiri framleiðendur. Auðvitað hefur þróun bóluefna verið mjög hröð en einmitt þess vegna eru enn þá uppi töluverðir óvissuþættir, sérstaklega hvað varðar þessi nýrri afbrigði. Það er harla erfitt að leggja mat á það í fjármálaáætlun til næstu fimm ára nákvæmlega hvernig þessi samsetning verður, þó að við vitum til að mynda að fjögur bóluefni eru uppistaðan í bólusetningum Íslendinga á fyrstu tveimur ársfjórðungum þessa árs. Hins vegar veita bóluefnin töluverða vörn gagnvart öllum afbrigðunum nema hugsanlega einu afbrigði þar sem tiltekin bóluefni eru ekki talin veita eins mikla vörn. Þetta eru þær upplýsingar sem við höfum núna. Þetta er sagt með þeim fyrirvara að við erum enn í raun og veru í ákveðnum rannsóknarfasa hvað varðar virkni bóluefna. Að fara hraðar í bólusetningar mun auðvitað hafa gríðarlega jákvæð, efnahagsleg áhrif af því að við erum að koma í veg fyrir veikindi fólks.

Hins vegar er eitt sem við þurfum að horfast í augu við, af því að hv. þingmaður nefnir hér ferðasumarið, og það er að við erum auðvitað ekki ein í heiminum og það þarf í raun að ljúka bólusetningu alls heimsins til þess að ná þessum faraldri endanlega niður. Þannig er það. Það er stóra verkefnið þar sem Íslendingar hafa raunar staðið sig ágætlega með framlögum til alþjóðlegra bólusetningarverkefna og við höfum þannig lagt okkar af mörkum í þeim efnum.