fjármálaáætlun 2022--2026.

Hæstv. forseti. Því er fyrst til að svara, aðeins að bæta við svarið frá því áðan, að árangurinn sem hv. þingmaður gerði að umtalsefni á grundvelli árangursmælikvarða er alltaf birtur í ársskýrslu ráðherra. Auðvitað er það alveg rétt hjá hv. þingmanni að sumt er auðveldara að meta árangur af en öðru. Við þekkjum hvernig það er. Sumt er meira mælanlegt en annað en við þurfum ekki að verja tíma í heimspekilegar vangaveltur um það hér.

Mig langar að koma inn á kaup á losunarheimildum sem hv. þingmaður nefndi. Þá er verið að miða við hið svokallaða Kyoto-tímabil frá 2013–2020 og er ljóst að við munum því miður þurfa að kaupa losunarheimildir einfaldlega vegna þess að íslensk stjórnvöld gripu á þessu tímabili ekki nægjanlega snemma í taumana. Þó svo að það hafi verið gert með stórauknum aðgerðum núverandi ríkisstjórnar var komið það seint inn á tímabil að það dugði ekki til, því miður. Við erum ekki komin með það endanlega hvað þetta mun kosta og því er það ekki inni í þessari áætlun þannig að bregðast þarf við því sérstaklega.

Varðandi brennslumálin sem ég og hv. þingmaður höfum oft rætt í ræðustóli Alþingis, og ég fagna þeirri umræðu enn og aftur, þá held ég að við séum sammála um að þar þarf að koma til að við brennum það magn sorps sem ekki getur farið til endurnotkunar eða endurvinnslu af því að það er betra að brenna það en urða. Þá getum við líka búið til orku, rafmagn, úr slíku. Úrgangsmálin eru á ábyrgð sveitarfélaganna en við erum í samstarfi við Samband íslenskra sveitarfélaga að finna út úr því með hvaða móti er best að gera þetta fyrir landið í heild sinni.

Aðeins varðandi skógræktina: Ég hef verið að setja aukna fjármuni til skógræktar, landgræðslu og endurheimtar votlendis og það er mín skoðun að við eigum að halda áfram á þeirri braut, einfaldlega vegna þess að það skilar okkur árangri í loftslagsmálum og er líka mikilvægt í öðrum tilgangi eins og t.d. að endurheimta horfin vistkerfi og takast á við áskoranir í náttúruvernd.