fjármálaáætlun 2022--2026.

Hæstv. forseti. Það er afskaplega mikilvægt að við gerum okkur öll grein fyrir því í þessari umræðu, þar sem hv. þingmaður nefndi að framlög til loftslagsmála færu lækkandi eftir árið 2023, að það er rétt ef maður horfir á þær tölur sem eru á tekjuhliðinni, þ.e. ívilnanirnar, vegna þess að þarna er gert ráð fyrir að ívilnanir vegna umhverfisvænni bíla falli niður. Það er þó ekki endilega víst að það verði þannig, einfaldlega vegna þess að ekki hafa verið teknar ákvarðanir hér á Alþingi um það hvort þær verði framlengdar. Vonandi þarf ekki að framlengja þær vegna þess að vonandi verða þessar bifreiðar orðnar samkeppnishæfar við dísilbílinn og bensínbílinn en ef þarf að framlengja er ég sannfærður um að Alþingi muni taka ákvörðun um að gera það til að halda áfram á þeirri vegferð að ýta undir orkuskiptin, eða að beina þessum ívilnunum í einhverja aðra átt, t.d. vegna þungaflutninga eða skipa.

Hvers vegna er þetta árið 2031? Þar erum við náttúrlega að miða við að skuldbindingartímabilið er út árið 2030. Ég held að það sé bara ágætt að almenningur viti að sýn íslenskra stjórnvalda núna er að setja þennan milljarð inn árlega og halda því áfram líka fram yfir tímabil þessarar fjármálaáætlunar.

Mig langar að lokum að taka undir það sem hv. þingmaður nefnir þegar hann talar um mikilvægi nýsköpunar og grænna fjárfestinga. Ég minni þar á frumvarp fjármálaráðherra, sem liggur fyrir þinginu, um að auka grænar fjárfestingar, gefa skattafslætti til fyrirtækja sem ráðast í ákveðnar gerðir af fjárfestingum sem uppfylla ákveðin viðmið og geta talist „grænar“. Sama má segja um nýsköpunina. Þar hefur stórauknu fjármagni verið úthlutað. Síðast í þessari viku var verið að úthluta fjármagni til nýsköpunarverkefna úr loftslagssjóði sem var loksins árið 2019 tekinn í gagnið.