yfirtaka á SpKef sparisjóði.

Herra forseti. Ég skal upplýsa þingheim og hv. þingmann um hvað verið er að fara fram á í þessari skýrslubeiðni. Hinn 22. apríl 2010 tók Fjármálaeftirlitið ákvörðun um ráðstöfun eigna og skulda Sparisjóðs Keflavíkur til SpKef sparisjóðs. Var þetta gert í þeirri viðleitni að forða innlánseigendum frá því að tapa fé við gjaldþrot sparisjóðsins. Íslenska ríkið stofnaði svo sparisjóðinn SpKef. Samkvæmt skýrslu Ríkisendurskoðunar nam kostnaður ríkisins, að teknu tilliti til vaxta, samtals 25 milljörðum kr. vegna SpKef. Var greiðslan innt af hendi til Landsbankans með ríkisskuldabréfi.

Ríkið skuldbatt sig til að greiða Landsbankanum þann mun sem var á verðmæti yfirtekinna eigna og skulda. Í ljósi alls þessa þá skiptir það ríkissjóð og skattgreiðendur miklu að fá upplýsingar um hvert var tjón Landsbankans, m.a. hvert var hið raunverulega tjón Landsbankans og hvernigeignaumsýslu Landsbankans var háttað, þ.e. hvert yfirteknum eignum vegna SpKef var ráðstafað og á hvaða verði. Jafnframt skiptir miklu máli að fyrir liggi hvaða upplýsingar voru þegar til staðar um eiginfjárstöðu og lausafjárvanda Sparisjóðs Keflavíkur þegar svo afdrifaríkar ákvarðanir um ráðstöfun fjármuna úr ríkissjóði voru teknar.

Verkefni rannsóknarnefndarinnar, þ.e. Alþingis, (Forseti hringir.) var að rannsaka aðdraganda og orsök erfiðleika og falls sparisjóðanna. (Forseti hringir.) Henni var ekki falið að rannsaka hvernig úrvinnslu eigna sparisjóðsins var háttað. (Forseti hringir.) Þá tók rannsóknarnefndin ekki á því hvert endanlegt tjón ríkissjóðs var vegna (Forseti hringir.) ákvörðunar um ráðstöfun eigna og skulda Sparisjóðs Keflavíkur og SpKef sparisjóðs eða (Forseti hringir.) eignaumsýslu Landsbankans.

Tilgangur þessarar skýrslubeiðni er að varpa (Forseti hringir.) ljósi á þessa hagsmuni ríkissjóðs sem ekki hefur verið fjallað um.

(Forseti (SJS): Ræðutímanum var löngu lokið.)