völd og áhrif útgerðarfyrirtækja.

Virðulegi forseti. Þetta er gömul umræða og ný. Hvernig eigum við að skipta ávinningnum af sameiginlegri auðlind? Hv. þingmaður minnist á samþjöppun. Hvernig byrjaði samþjöppunin? Af hverju var frjálsa framsalið samþykkt? Hvers vegna barðist fyrrverandi formaður Samfylkingarinnar, Jóhanna Sigurðardóttir, fyrir því hér í þessum sal og greiddi með því atkvæði að framsalið yrði frjálst? Hvers vegna? Það var vegna afkastagetu flotans okkar, fyrirtækin í landinu gátu sótt miklu meiri afla en afrakstursgeta miðanna bauð upp á. Við þurftum að aðlaga þetta tvennt. Þess vegna náðum við einmitt þeim árangri sem að var stefnt með samþjöppun heimildanna. Að þessu var stefnt með opin augun vegna þess að útgerðinni gekk illa. Bæjarútgerðunum gekk víða illa. Að því leytinu til get ég ekki tekið undir að það hafi verið mistök að auka framleiðnina í greininni. Sumir þeir sem tala fyrir hærra veiðigjaldi segja einmitt: Hækkum veiðigjaldið enn meira til þess að fá enn meiri samþjöppun, látum þá sem minnstu skila af veiðunum, minnstan afrakstur hafa af veiðunum, heltast úr lestinni. Hækkum veiðigjaldið til að tryggja að veiðarnar eigi sér bara stað hjá þeim sem geta veitt með sem hagkvæmustum hætti. Þarna liggur dálítið mótsögnin hjá þeim sem tala í senn gegn því að til staðar séu stórfyrirtæki og vilja hækka gjaldið sem mest af því að það eru bara hagkvæm stór fyrirtæki sem geta risið undir miklu hærra gjaldi. En gjaldið leggst ekki með ólíkum hætti á litlar og stórar útgerðir heldur notum við í raun og veru meðaltal allra veiðiferða sem grunn að gjaldinu í dag.

Ég tel að það sé enginn fótur fyrir því að það skorti vilja á Íslandi til að rannsaka þessi mál. Ég kalla eftir sönnun um það. Ég vísa til orða þeirra sem fara með þessar rannsóknir (Forseti hringir.) um að þeir séu á fullu við að sinna þeim og þeir hafi fengið fjármagn til þess. Þannig að það er enginn fótur fyrir því. (Forseti hringir.) Við getum svo haldið áfram að ræða hér um önnur atriði sem spurt var um.