verðtrygging og verðbólga.

Herra forseti. Ég fór hér áðan yfir horfurnar hvað varðar verðbólguna og við þurfum líka að horfa til þess að þær spár sem núna eru að birtast byggi á því annars vegar að styrking krónunnar verði til þess að draga úr verðbólgu og að viðspyrna ferðaþjónustunnar, sem við getum verið nokkuð bjartsýn á miðað við stöðuna núna, muni sömuleiðis styðja við þá þróun, þannig að ég held að það skipti miklu máli að horfa til þróunar á næstu mánuðum í þessum efnum.

Ég vil líka minna hv. þingmann á að hér inni í þingi er ríkisstjórnarfrumvarp um vexti og verðtryggingu sem miðar að ákveðnum takmörkunum á 40 ára verðtryggðum lánum. Það væri óskandi að hægt væri að ljúka vinnu við það frumvarp, sem var hluti af yfirlýsingu okkar í tengslum við lífskjarasamninga. Þegar við skoðum hvernig þessi mál hafa verið að þróast þá hefur þróunin verið sú að markvisst hefur dregið úr vægi verðtryggingar á innlendum lánamarkaði. Mun fleiri velja sér óverðtryggð lán. Það er jákvæð breyting gagnvart verðtryggingunni. Þetta frumvarp er hér inni og það er hægt að ljúka vinnu við það.