þjóðkirkjan.

Herra forseti. Biskupsembættið er elsta embætti Íslands sem haldist hefur frá upphafi, stofnað á Alþingi 1056. Hugtakið embætti í kirkjunni hefur sérstaka merkingu sem byggir á guðfræði hennar og er kirkjufræðilegt. Um það snýst þetta mál. Saga og hefðir eru dýrmætar eignir sérhvers samfélags, rétt eins og menning þess. Með því að fella niður hugtakið „embætti biskups“ og breyta því í „starf biskups“ hefur það ekki lengur þann styrk sem biskupsembættið hefur haft í kirkjunni, allt frá frumkirkjunni og í samhengi Íslands í meira en 1000 ár.

Herra forseti. Vegna sögu sinnar í samfylgd þjóðarinnar og á ábyrgð Alþingis allt frá kristnitöku er mikilvægt að embætti biskups í þjóðkirkju verði tryggt með lögum. Með hliðsjón af þessu er lagt hér til að bæta við 2. mgr. 10. gr. frumvarpsins að biskup gegni æðsta embætti kirkjunnar. Ég segi já.