fbiðlistar í heilbrigðisþjónustu.
Virðulegi forseti. Ég vil þakka hv. þingmanni fyrir leiðbeiningarnar um að beita ekki útúrsnúningum í svari mínu og velti fyrir mér hvað gefi þingmanninum tilefni til að ætla að svar mitt verði með þeim hætti. Nýlega skilaði ég skýrslu til þingsins um afleiðingar Covid-19 á bið eftir þjónustu heilbrigðiskerfisins. Þar kemur fram að staðan er í raun betri en óttast var þó svo að Covid-19 hafi sannarlega haft áhrif á bið eftir þjónustu. Sérstaklega er því til að svara að þegar um er að ræða bið eftir geðheilbrigðisþjónustu hefur hún aukist lítillega. Þá hafa líka tímabundnar lokanir vegna Covid-19 skipt mestu máli, en t.d. hefur bið eftir ADHD-greiningu á BUGL styst þannig að þetta er nú með ýmsum hætti.
Aðgengi að geðheilbrigðisþjónustu hefur líka verið aukið til mikilla muna í tíð þessarar ríkisstjórnar með fjölgun sálfræðinga og stofnun geðheilsuteyma í öllum heilbrigðisumdæmum. Það hefur verið mín stefna að auka þjónustu sálfræðinga og sjúkraþjálfara við heilsugæsluna um allt land. Að auki hefur verið varið sérstöku fjármagni í samningagerð við sjálfstætt starfandi sálfræðinga og unnið er að því um þessar mundir að ljúka þeirri samningagerð, en líka um þverfaglega geðheilbrigðisþjónustu við börn sem ástæða er til að horfa sérstaklega á.
Hv. þingmaður spyr líka um liðskipti sem verið hefur áhyggjuefni um langt árabil. Lengi hefur verið sérstaklega eyrnamerkt átaksfjármagn til að vinna á biðlistum út af liðskiptaaðgerðum. Þeir lengdust nokkuð í Covid og við erum að fara í sérstakt átak til að stytta þann biðtíma. Ég vona að ég fái ráðrúm til að gera grein fyrir því hér í síðara svari.
