áhrif Covid-19 á biðlista í heilbrigðisþjónustu.
Virðulegur forseti. Í skýrslu heilbrigðisráðherra til undirritaðs og fleiri þingmanna um áhrif kórónuveirufaraldursins á biðlista í heilbrigðiskerfinu var sérstaklega óskað eftir að fjallað væri um hvernig biðlistar hafa þróast eftir að kórónuveirufaraldurinn kom upp í landinu, sem og hvaða aðferðum hefur verið beitt til að takmarka vöxt biðlista og vinna niður biðlista í framtíðinni. Í skýrslunni kemur fram að vegna Covid-19 hafa biðlistar aukist um 102% eftir ákveðinni aðgerð hjá konum og 118% í annari, einnig hjá konum. Þar að auki er aukning á biðlista 94% vegna gallsteina, 78% vegna aðgerða á augasteinum, 67% vegna liðskipta á hné og 64% vegna liðskipta á mjöðm, allt vegna Covid-19. Hjá átröskunarteyminu er aukningin 50,9% og hjá ADHD-teyminu er aukningin á biðlista um 43,4% vegna Covid-19. Hjá átröskunarteyminu hefur biðin farið úr 18,4 vikum í 44,7 vikur eða úr þremur mánuðum í nærri 11 mánuði. Ástæðan er húsnæðisvandi, fækkun starfsmanna, Covid-19, nýliðun, afleysingar og starfsþjálfun. Hjá þunglyndis- og kvíðateymi er skortur á fagfólki sem lengir biðlistann og hægir á inntöku nýrra mála. Fjöldi beiðna á bið eftir sálfræðiþjónustu 1. febrúar 2020 var 539 en 2021 var hann 1.344, fór úr 539 í 1344. Þá telur meiri hluti heilbrigðisstofnana á landsbyggðinni lengingu biðlista vera vegna manneklu frekar en Covid-19.
Því spyr ég hæstv. heilbrigðisráðherra: Er heilbrigðiskerfið komið yfir þolmörk? (Forseti hringir.) Er farin að stafa hætta af biðlistum fyrir það fólk (Forseti hringir.) sem er núna að bíða eftir aðgerðum?
