fjárlög 2022.

Virðulegi forseti. Ég þakka hv. þm. Þórhildi Sunnu Ævarsdóttur fyrir andsvarið. Gera hvort tveggja? Jú, ég hef ítrekað sagt að ef við getum tekið 13 milljarða til að setja í loftslagsvána, sem sannarlega er fyrir hendi og við ættum nú að vera voða góð og elskuleg og hugsa til komandi kynslóða, þá vil ég um leið setja akkúrat tvisvar sinnum meira í fátæka fólkið. Þá vil ég taka fjármagn frá þeim sem eiga nóg af því: Ég vil taka það frá bönkunum. Ég vil taka það af sjávarauðlindinni. Ég vil taka frá sægreifunum, og gjörið svo vel og takið frekari þátt í samfélaginu en þið gerið raunverulega. Það er það sem ég er að segja: Fólkið fyrst. En líka það að ég efast um að fátækt fólk sé einmitt að velta því fyrir sér hvað það eigi að gera til þess að eyða fleiri krónum í baráttuna við loftslagsvána þegar það á ekki fyrir næstu máltíð. Ég efast um að það sé svoleiðis. Þegar ég tala um að fólkið eigi að koma fyrst þá er ég að segja: Við skulum hjálpa öllum til að taka þátt í samfélaginu og berjast sameiginlega gegn loftslagsvánni en ekki að vera að sýna það svart á hvítu að til séu 13 milljarðar í baráttuna við loftslagsvána á meðan ekki eru til peningar til að gefa fólki að borða. Ég vil sækja peningana til þeirra sem eiga nóg af þeim fyrir. Setjum 13 milljarða í loftslagsvána, setjum 300 milljarða í loftslagsvána en setjum alltaf tvisvar sinnum meira til þeirra sem þurfa á því að halda.