fjárlög 2022.

Frú forseti. Ég þakka hv. þingmanni andsvarið. Ég held að ef við höfum komið lögum um opinber fjármál fyrir með þeim hætti að ef það þurfi að fara í krúsidúllur út af þeim þá geti það ekki hafa verið markmiðið. Samgöngubætur, nýframkvæmdir og viðhald á samgöngukerfinu er einfaldlega það mikilvægt verkefni hvað rekstur samfélagsins varðar að ég held að arðsemi þeirra sé alltaf umfram þann fjármögnunarkostnað sem ríkissjóður verður fyrir, sérstaklega í núverandi ástandi. Ef það eru lög um opinber fjármál, sem margt bendir til hvað varðar framsetningu laga um samgöngumannvirki á sínum tíma, sem þvinga menn í þessa átt, þá þurfum við mögulega að breyta lögum um opinber fjármál. Ég held að það sé beinlínis nauðsynlegt að skoða hvernig til hefur tekist með þá lagasetningu. Ég held að það sé mjög margt gott í henni, fyrirsjáanleiki og agi, en það er líka eitt og annað sem hefur kannski ekki tekist eins og til var ætlast. Nefni ég bara sem dæmi þennan undarlega skattastyrk sem ég tók til umræðu í ræðu minni í gær og undir stefnuræðu forsætisráðherra. Þar eru menn komnir á allt annan stað en lögin gerðu ráð fyrir hvað þann þátt varðar. Nú er búið að flagga því að það verði loksins farið að vinna þá vinnu sem er búið að kalla eftir allt síðasta kjörtímabil, varðandi það að uppfæra gjaldtökukerfi fyrir umferð, en við verðum að muna það á sama tíma að gjaldtaka af ökutækjum og akstri er gríðarlega há í heildina. (Forseti hringir.) Jafnvel þó að við tökum virðisaukaskatt af öllum þessum vörum út úr myndinni, þá er heildarskattlagning á akstur og ökutæki mjög há á Íslandi. (Forseti hringir.) En ef við horfum á heildarmyndina, ekki bara gömlu eyrnamerktu gjöldin, rennur mjög hóflegur hluti af því til reksturs og uppbyggingar vegakerfisins.