störf þingsins.

Virðulegur forseti. Ég ætla að skipta aðeins um gír og tala um algjört smámál sem þó er að mörgu leyti stórmál. Okkur nýjum þingmönnum var á dögunum úthlutað netfangi svo almennir borgarar og aðrir geti haft samband við okkur með sem skjótustum og einföldustum hætti. Ég hef sjálf oft um ævina átt í tölvupóstssamskiptum við þingmenn og hef þá sent póst á netföng eins og helgihrafn@althingi.is, andresingi@althingi.is eða birgir@althingi.is. Mér var hins vegar úthlutað netfanginu arndis.anna.kristinardottir.gunnarsdottir@althingi.is, heil 53 stafbil, tölvupóstfang sem er lengra en meðaltölvupóstur. Þegar ég óskaði eftir að fá þessu breytt var mér tjáð að nýjar reglur frá einhverri nefnd í fjármálaráðuneytinu kveði á um að netföng þingmanna og starfsfólks þingsins skuli mynduð með þessum hætti héðan af.

Það er mikilvægur þáttur í lýðræðinu að fulltrúar þjóðarinnar á þingi séu aðgengilegir. Þingmenn eru ekki starfsmenn stjórnsýslunnar sem starfa nafnlaust í hennar nafni og eiga ekki að þurfa að þola óþarfa ágang frá almenningi. Þingmenn eru ekki starfsmenn þingsins sem eiga einnig að njóta verndar í störfum sínum. Þingmenn eru fulltrúar almennings í löggjafarsamkundu þjóðarinnar. Af því leiðir að þingmenn eiga að vera eins aðgengilegir og kostur er að virtri lágmarkspersónuvernd, sem einnig er afar takmörkuð fyrir fólk í þessari stöðu. Reglan þjónar í ofanálag engum tilgangi og leysir vandamál sem er ekkert.

Þetta er kannski lítill prófsteinn á sjálfstæði löggjafarsamkundu þjóðarinnar en prófsteinn engu að síður. Ég vil því biðla til forseta að beita sér fyrir því að Alþingi þurfi ekki að beygja sig undir óþarfa duttlunga stjórnsýslunnar sem í ofanálag stríða gegn þeim mikilvæga þætti lýðræðisins að fulltrúar þjóðarinnar á Alþingi séu almenningi eins aðgengilegir og kostur er.