vegurinn um Vatnsnes.

Frú forseti. Ég þakka hv. þingmanni jákvæðar heitstrengingar um að afla meira fjár til tengivega. Ég er sammála hv. þingmanni að það er mikilvægt að ráðast sem fyrst í þetta. En ég vil ítreka að á liðnum árum hefur staða Vatnsnesvegar breyst. Hann er vissulega meira keyrður, umtalsvert meira, af heimamönnum vegna breyttra atvinnuhátta, fjölgunar ungra fjölskyldna á svæðinu en líka af ferðamönnum, sem er vel. Við þurfum hins vegar að setja meira fé í þennan málaflokk. Þegar ég kom að Vatnsnesvegi var hann bara einn af tengivegum landsins og á milli þeirra vega átti að skipta heilum milljarði á öllu Íslandi á næstu árum. Það fara 500–600 millj. kr. í þennan veg á næsta ári og það er búið að setja restina af veginum inn á samgönguáætlun þannig að verkefnið varðandi þennan veg er að flýta því. Verkefnið gagnvart öllum öðrum vegum, og öllum öðrum skólabörnum sem keyra líka langan veg í öðrum landshlutum, er að fá meira fé í tengivegina og horfi ég yfir til ýmissa sem sitja í fjárlaganefnd til að fá stuðning við slíkt.