staðgreiðsla opinberra gjalda o.fl.
Virðulegi forseti. Ég þakka hv. þingmanni fyrir framsöguna. Ég vildi spyrja hv. þingmann um einn hluta af þessu máli sem snýr að því hversu ótrúlega seint það er fram komið; ég velti fyrir mér sanngirnissjónarmiðinu gagnvart því að þeir sem stóðu skil á greiðslum á réttum tíma, 1. janúar, hafi ekki kost á því að fá þessar greiðslur endurgreiddar, en að þeir sem biðu fram á síðustu stundu geti sloppið við þennan gjalddaga. Hefði málið komið fram á eðlilegum tíma, t.d. fyrir jól þegar fyrir lá að þessi gjalddagi yrði vissulega núna í janúar og að vissulega þyrfti að liðka til fyrir veitingageirann — hæstv. fjármálaráðherra staðhæfði í fréttum 10. desember að bregðast þyrfti við og liðka þyrfti til fyrir veitingageirann. Ef frumvarpið hefði komið fyrir áramót hefðu fyrirtækin staðið á jafnréttisgrundvelli að mínu mati gagnvart þessum úrræðum, en þess í stað virðist hending svolítið ráða því hvort fyrirtæki geti sloppið við að greiða opinber gjöld núna 1. janúar eða ekki.
Er hv. þingmaður sammála mér í því að réttara hefði verið að málið kæmi fram fyrir jól þannig að það væri meira jafnræði á milli þeirra fyrirtækja sem geta nýtt sér þessa ívilnun?
