Bráðabirgðaútgáfa.

152. löggjafarþing — 36. fundur,  9. feb. 2022.

störf þingsins.

[15:30]
Horfa

Thomas Möller (V):

Forseti. Stundum er sagt að glöggt sé gests augað. Sem varaþingmaður má segja að ég sé gestur hér þessa viku og hef m.a. varið tíma mínum í að skoða umfang stjórnkerfis okkar litla lands. Ég vil hvetja þingmenn til að staldra við og íhuga hvort ekki sé hægt að minnka yfirstjórn landsins og draga þannig úr kostnaði.

Ímyndum okkur að við værum að stofna okkar lýðveldi núna. Myndum við byrja með því að setja á stofn 180 ríkisstofnanir og 40 ríkisfyrirtæki, 700 ráð og nefndir til að halda kerfinu gangandi? Myndum við búa til Stjórnarráð með um 800 starfsmönnum og 12 ráðuneytum? Ég held ekki. Væri þörf á Seðlabanka með 300 starfsmönnum? Þurfum við 40 eftirlitsstofnanir eða mætti hugsanlega sameina þær? Myndum við skipta landinu í 69 sveitarfélög eða myndu bara 12 duga? Yfirbygging okkar litla lands er orðin allt of stór að mínu mati og ég hef grun um að skattgreiðendur þessa lands séu mér flestir sammála.

Báknið stækkar stöðugt í tíð núverandi ríkisstjórnar. Nýjasta útspilið er að setja 2 milljarða í fjölgun ráðuneyta. Ég er alls ekki að kasta rýrð á störf opinberra starfsmanna og flestir þeirra eru að veita okkur frábæra þjónustu. En almenningur sér hvað ríkiskerfið þenst út á hverjum degi, yfirbyggingin stækkar þegar auglýst er eftir fleiri starfsmönnum og skrifstofubyggingar ríkisins rísa upp hér allt í kringum okkur. Um hver mánaðamót birtist umfang hins opinbera þegar launþegar sjá að aðeins um helmingur launanna er greiddur út. Hinn helmingurinn fer í opinber gjöld enda er Ísland nú með næstmestu skattpíningu á Vesturlöndum.

Forseti. Ég hvet því þingmenn til að staldra við og íhuga hvort ekki megi gera betur í þessum efnum. Viðreisn mun koma með og styðja allar hugmyndir sem draga úr yfirbyggingu ríkisins og gera þjónustu hins opinbera skilvirkari og hagkvæmari, t.d. með stafrænum lausnum. (Forseti hringir.) Einnig munum við koma með hugmyndir sem lækka álögur á fyrirtækin og heimilin í landinu.