umhverfismat framkvæmda og áætlana.

Virðulegi forseti. Ég þakka hv. þm. Stefáni Vagni Stefánssyni fyrir andsvarið. Nei, ég hef nú ekki miklar áhyggjur af því. Miðað við nútímann og hvernig staða okkar er í dag finnst okkur eðlilegasti hlutur í heimi að þessar virkjanir fari í umhverfismat. Þetta er ekki það þröngt að einyrkinn geti ekki virkjað bæjarlækinn á jörðinni sinni fyrir eigin orkuframleiðslu. Þetta mál er ekki þannig vaxið og ég tel á engan hátt að verið sé að þyngja kerfið að neinu leyti. Ég tel þetta hins vegar koma í veg fyrir þá tilhneigingu sem sást greinilega þegar frumvarpið var smíðað á sínum tíma — fyrir þremur til fjórum árum, maður er hættur að telja hve oft maður hefur mælt fyrir þessu — að menn voru safna að sér smávirkjunum. Við vissum jafnvel að einn og sami aðilinn hafði óskað eftir 99 leyfum í þessu skyni. Það virtist vera þannig að menn vildu nýta sér þann möguleika að þær virkjanir sem við erum að reyna að ná utan um hér voru í þessum svokallaða B-flokki sem þýddi að þær þurftu ekki að gangast undir umhverfismat. Okkur í Flokki fólksins þykir það vænt um Ísland, náttúruna okkar og orkuna, að okkur þykir algjörlega sjálfsagt að það sem er í þessu formi, hvort heldur sem um er að ræða vatns- eða vindaflsvirkjanir, fari í umhverfismat.