yfirlýsing ráðherra sbr. 61. gr. þingskapa.
Virðulegi forseti. Afstaða íslenskra stjórnvalda hefur verið skýr og hún er enn skýr. Við höfum fram til þessa stutt friðsamlegar viðræður vegna spennunnar sem hefur verið að myndast sérstaklega í austurhluta Úkraínu, en nú þegar landamærin hafa verið rofin og innrás hafin í fullvalda, frjálst lýðræðisríki þá sendum við líka skýr skilaboð um að hlutirnir hafi breyst. Við fordæmum tilefnislausa árás Rússlands á Úkraínu og hún er í okkar huga og okkar heimshluta alls skýrt brot á alþjóðalögum, á lögum sem við byggjum fullveldið okkar hreinlega á. Það er á svona stundum sem við skulum minnast þess hvers virði það er að fá viðurkenningu annarra þjóða á því að það beri að virða landamæri og fullveldi ríkja, að fólkið sjálft megi ráða til úrslita málum heima fyrir. Það finnst þetta greinilega ekki öllum. Traðkað er á öllum þessum grundvallaratriðum og það er þess vegna ekki annað hægt en að horfa dálítið til talsverðra umsvifa Rússa í hafinu í kringum Ísland, t.d. og í lofthelginni í allt öðru ljósi í dag. Skyndilega hefur það bara allt aðra þýðingu að kafbátar Rússa hafa verið hér á sveimi í íslenskri efnahagslögsögu og flugvélarnar rjúfa reglulega íslenska lofthelgi. Öllu þessu verðum við að velta fyrir okkur og spyrja okkur spurninga sem lúta að framtíðinni og í millitíðinni og núna strax í dag þurfum við að senda út alveg skýr skilaboð um að við ætlum að standa með þeim sem starfa með okkur í varnarbandalaginu, Atlantshafsbandalaginu, og bregðast við af hörku og í samræmi við árásargirndina sem okkur er sýnd.
