störf þingsins.
Virðulegi forseti. Nú er að hefjast málþing undir yfirskriftinni Brotthvarf úr skólum, birtingarmynd ójafnra tækifæra? Velferðarvaktin stendur fyrir málþinginu í samvinnu við mennta- og barnamálaráðuneytið og félags-og vinnumarkaðsráðherra. Þar verður kynnt, meðal annars efnis, ný skýrsla um brotthvarf úr íslenskum framhaldsskólum. Þar er leitast við að kortleggja þætti sem spá fyrir um brotthvarf og námstafir. Niðurstöðurnar benda til þess að brotthvarf sé einmitt birtingarmynd ójafnra tækifæra í íslensku samfélagi. Fjallað er um brotthvarf frá öðru sjónarhorni en venjan hefur verið; í stað þess að beina athyglinni að nemandanum sjálfum þegar hann hverfur frá námi er athyglinni beint að félagslegum og efnahagslegum bakgrunni. Í ljós kemur að það er einkum tvennt sem skiptir mál: Menntun foreldra og heildartekjur fjölskyldurnar. Þetta segir að þótt brotthvarf eigi sér stað í framhaldsskólum þarf að bregðast fyrr við með námsstuðningi í grunnskóla og inngripum utan skólakerfisins. Í skýrslunni má finna ýmsar tillögur til úrbóta, m.a. mikilvægi samfellu í stuðningsúrræðum á milli grunn- og framhaldsskóla og aukna vitund og ábyrgð grunnskóla á brotthvarfi nemenda eftir lok grunnskóla.
Ég vil taka heils hugar undir þessar ábendingar og mikilvægi þess að skapa skólunum grundvöll til að fylgjast með afdrifum nemenda og til að grípa fyrr inn í með stuðningi. Í skólunum, bæði grunn- og framhaldsskólum, er þekking á leiðum til að styðja við þessa nemendur. Það er mikilvægt að stjórnvöld gefi þeim verkefnum gaum sem þegar eru unnin og styðji útfærslu á almennri notkun þeirra leiða sem best hafa reynst. Þekking, heildarsýn og forysta stjórnvalda í viðbrögðum við brotthvarfi frá námi er lykilatriði og með greiningarvinnunni og málþinginu er mikilvægt skref stigið á þeirri leið.
