mótun stefnu í aðdraganda aðgerðaáætlunar í heilbrigðisþjónustu við aldraða til ársins 2030.

Hæstv. forseti. Ég vil þakka hv. þingmanni seinna andsvar. Ég held að það sé gott sem hv. þingmaður hóf ræðu sína á, að minna okkur jafnframt á að þótt við séum í háfleygum hugmyndum um markmið og sýn er víða pottur brotinn og minnir mann á það að verkefnin eru víða erfið. Við erum með fjölmarga sem hafa þegar fengið færni- og heilsumat en fá ekki inni og þurfa á því að halda. Við megum ekki hoppa af vagninum og inn í þessi markmið og gleyma þeim verkefnum. Við þurfum að leysa það. Reglubundið safnast upp á Landspítala – háskólasjúkrahúsi fjöldi fólks sem hefur fengið meðferð, er með færni- og heilsumat en fær hvergi inni og teppir þá flæði inni á spítölunum, þetta þekkjum við, og stíflar bráðamóttöku. Þetta eru bara viðvarandi verkefni, dagleg verkefni og við eigum að þakka hv. þingmanni fyrir að minna okkur á það.

Síðan eigum við að horfa til fjölbreyttra lausna og ég þakka hv. þingmanninum fyrir að draga fram hér þetta úrræði sem varð til í tíð þáverandi félagsmálaráðherra, Eyglóar Harðardóttur. Við eigum að horfa til bæði fjölbreytni í uppbyggingu, hleypa fleirum að í fjármögnun, horfa til félagslegu fjármögnunarinnar og horfa til líka fjölbreyttari fjármögnunarforma. Ég horfi til lífeyrissjóðanna í þeim efnum. Ég held að það sé afar góð fjárfesting að horfa í auknum mæli, eins og aðrar þjóðir hafa gert, til fjárfestinga í fasteignum í afmörkuðu formi, eins og hv. þingmaður dregur hér fram. En ég ætla nú, þótt málefnið sé spennandi, að virða ræðutímann, hæstv. forseti.