ákvörðun nr. 383/2021 um breytingu á IX. viðauka við EES-samninginn.

Virðulegi forseti. Með þessari þingsályktunartillögu er leitað heimildar Alþingis til að staðfesta fyrir Íslands hönd ákvörðun sameiginlegu EES-nefndarinnar nr. 383/2021. Ákvörðunin fellir inn í samninginn tilskipun sem er hluti af regluverki ESB á sviði fjármálamarkaðar. Tilskipunin breytir reglum sem gilda um lánastofnanir og verðbréfafyrirtæki, sem hafa áður verið teknar upp í EES-samninginn.

Tilgangurinn með breytingunum er einkum að skerpa á ákvæðum sem hafa þótt óljós og hafa því verið túlkuð með mismunandi hætti innan innri markaðarins. Jafnframt er um að ræða uppfærslu á evrópsku regluverki út frá þróun alþjóðlegra viðmiða um bankastarfsemi, svonefndra Basel-staðla. Á meðal helstu efnislegu breytinga er að móðurfélögum banka er almennt gert að afla leyfis og stórum alþjóðlegum bankasamstæðum er gert að hafa móðurfélag fyrir starfsemi í Evrópusambandinu. Möguleikar eftirlitsaðila á að leggja auknar eiginfjárkröfur á banka í tengslum við svonefnt könnunar- og matsferli til að mæta kerfislægri áhættu eru takmarkaðir, en á móti er sveigjanleiki við setningu eiginfjárauka til að mæta kerfisáhættu aukinn.

Í ákvörðun sameiginlegu nefndarinnar, sem mælir fyrir um upptöku gerðarinnar í EES-samninginn, er gerðin löguð að tveggja stoða kerfi samningsins. Þær aðlaganir eru í fullu samræmi við aðlaganir fyrri gerða á sviði eftirlitsstofnana á fjármálamarkað.

Fyrirséð áhrif innleiðingar tilskipunarinnar hér á landi eru ekki talin veruleg. Innleiðing hennar er þó liður í því að samræma lagaumgjörð fjármálafyrirtækja gildandi regluverki á Evrópska efnahagssvæðinu sem greiðir fyrir samstarfi eftirlitsaðila og viðskiptum við önnur ríki á svæðinu.

Virðulegi forseti. Ákvörðunin kallar á lagabreytingar hér á landi og stefnt er að því að fjármála- og efnahagsráðherra leggi fram frumvarp til innleiðingar á tilskipuninni á yfirstandandi löggjafarþingi. Utanríkismálanefnd, stjórnskipunar- og eftirlitsnefnd og viðskipta- og efnahagsnefnd fengu tilskipunina til skoðunar á síðasta löggjafarþingi og höfðu ekki athugasemdir við upptöku hennar í EES-samninginn.

Ég legg til, virðulegi forseti, að við lok þessarar umræðu verði tillögunni vísað til hv. utanríkismálanefndar.