niðurstöður úttektar á stöðu og áskorunum í orkumálum með vísan til markmiða og áherslna stjórnvalda í loftslagsmálum, munnleg skýrsla umhverfis-, orku og loftslagsráðherra. - Ein umræða.
Virðulegi forseti. Ég fagna því að þingið gefi sér tíma til að ræða niðurstöður grænbókarinnar. Hér hafa verið viðraðar áhyggjur af því að tíma þingsins gæti verið betur varið. Ég er ósammála því. Hvaða mál er nú mikilvægara að ræða á þinginu en umhverfis- og loftslagsmálin? Niðurstöður grænbókar hæstv. umhverfis-, orku- og loftslagsráðherra eru í raun sláandi. Íslendingar hafa sett sér háleit markmið í loftslagsmálum en fjárfestingar í orkuframkvæmdum hafa hingað til ekki fylgt þeim markmiðum eftir. Það er einskis virði að setja sér markmið ef við ætlum ekki að framkvæma þau. Við getum stefnt að hvaða samdrætti sem er í losun gróðurhúsalofttegunda, þess vegna 100%. Við gætum lýsti yfir markmiði um að ná kolefnishlutleysi allt eins á morgun, um að Ísland verði jarðefnaeldsneytislaust hinn daginn. Ef þetta eru bara orðin tóm, ef þetta eru bara tölur á blaði, þá skiptir það í rauninni ekki máli. Hver sem er getur skrifað upp metnaðarfull markmið, hver sem er getur byggt skýjaborgir en til að fylgja markmiðunum eftir, til að fylgja eftir samdrætti í losun gróðurhúsalofttegunda, til að framkvæma hér raunveruleg orkuskipti, til að Ísland verði óháð jarðefnaeldsneyti fyrst allra landa, þarf drifkraft og þor og til þess þarf framsýni og áræðni. Ég hef miklar væntingar til þess að hæstv. ráðherra framkvæmi þessi markmið íslenskra stjórnvalda.
Virðulegi forseti. Endamarkið er skýrt en það er verkefnalistinn líka. Það þarf að auka raforkuframleiðslu og efla flutnings- og dreifikerfi landsins. Ákall um meiri orku og um orkuöryggi kemur úr öllum landshlutum. Það þarf að nýta orkuna betur, það þarf að auka orkusparnað, það þarf að einfalda og betrumbæta stjórnsýslu við leyfisveitingar, og allt þetta þarf að gera í sem mestri sátt við samfélagið og við náttúruna. Þótt verkefnið sé skýrt er ekki þar með sagt að það sé einfalt. Það er ljóst að áskoranirnar eru til staðar fyrir Ísland í orkumálum en í þeim felast líka gríðarleg tækifæri. Sérstaða okkar og sérþekking í umhverfis- og orkumálum er mikil og framlag Íslands því mikils virði.
Hæstv. umhverfis-, orku- og loftslagsráðherra segir gjarnan að góðar skýrslur eigi ekki að rykfalla í skúffum og í geymslum heldur eigi að nýta þær til að framkvæma, til þess að betrumbæta. Ég skora á hæstv. ráðherra að framkvæma markmið íslenskra stjórnvalda í loftslagsmálum, að framfylgja raunverulegum orkuskiptum á Íslandi.
