orkuskipti og raforkuöryggi.

Herra forseti. Orkuskiptin hafa verið alfa og omega í málflutningi umhverfis-, orku- og loftslagsráðherra frá því að hann tók við embætti í lok síðasta árs. Samdráttur í losun gróðurhúsalofttegunda frá samgöngum er enda eitt af mikilvægari úrlausnarefnum á sviði loftslagsmála. Annað ekki síður mikilvægt verkefni er að tryggja heimilum og fyrirtækjum raforkuöryggi. Það verður ekki gert innan núgildandi lagaramma og ljóst að ákveða þarf hvaða opinberi aðili ber ábyrgð á afhendingaröryggi raforku hér á landi.

Forseti. Ekkert í núverandi lagaumhverfi raforkunýtingar gerir stjórnvöldum kleift að stýra raforkuframleiðslu hér á landi þannig að hún nýtist beint til orkuskipta. Þannig hafa stjórnvöld ekkert í höndunum, engin nauðsynleg tæki til að framfylgja áætlunum sínum um samdrátt í losun gróðurhúsalofttegunda og uppfylla þannig markmið okkar í loftslagsmálum. Settar hafa verið fram sex sviðsmyndir í stöðuskýrslu sem ráðherra lét gera um stöðuna í loftslagsmálunum og um loftslagsmarkmið Íslands. Þær sviðsmyndir gera ráð fyrir allt frá 9% aukningu raforkuframleiðslu til tvöföldunar hennar, eða 124% aukningar, til ársins 2040.

Mig langar að nýta þetta tækifæri hér, forseti, til að spyrja hæstv. loftslagsráðherra hvort hann hafi lagt mat á þessar sviðsmyndir sem fram koma í stöðuskýrslunni og hvort einhver þeirra verði grundvöllur raforkuframleiðslu hér í næstu framtíð. Í öðru lagi langar mig að spyrja ráðherrann hvað líði innleiðingu þriðja orkupakkans í íslenska löggjöf. Hvernig hyggst ríkisstjórnin uppfylla þá skyldu sína, sem kennd er við alþjónustu, að tryggja raforkuöryggi heimila og fyrirtækja hér á landi annarra en stórnotenda? Það er mjög brýnt verkefni, eins og nýleg dæmi sanna.