Bráðabirgðaútgáfa.

152. löggjafarþing — 90. fundur,  14. júní 2022.

tekjuskattur.

23. mál
[15:19]
Horfa

Frsm. efh.- og viðskn. (Jóhann Páll Jóhannsson) (Sf):

Frú forseti. Ég mæli hér fyrir frumvarpi efnahags- og viðskiptanefndar um breytingu á lögum um tekjuskatt, nr. 90/2003 (fyrningarálag á grænar eignir o.fl.).

„Með frumvarpinu eru gerðar lagfæringar á tekjuskattslögum. Annars vegar er lögð til viðbót við 21. gr. laganna sem er ætlað að eyða óvissu í kjölfar úrskurðar yfirskattanefndar í máli nr. 42/2022, sem varðaði úthlutun við slit einkahlutafélags sem greidd var með öðrum eignum en peningum. Hins vegar er um að ræða lagfæringu á ákvæði til bráðabirgða LXX sem varðar fyrningarálag á grænar eignir.

Með breytingunni í 1. gr. er áréttuð sú meginregla sem gilt hefur að allar eignfærslur úr atvinnurekstri skuli gera upp til skatts á verði sem ótengdir aðilar hefðu samið um. Hér undir falla m.a. þau tilvik þegar greiðsla er í öðru formi en peningum en við þær aðstæður skal ákvarða hagnað eða tap líkt og um sölu eignanna hafi verið að ræða. Á framangreint t.d. við séu eignir rekstrarins nýttar sem greiðslueyrir til að mæta skuldbindingu við eigendur vegna ákvörðunar um almenna úthlutun arðs, lækkun hlutafjár eða slit eða af öðrum ástæðum. Af því leiðir að sé armslengdarverð úthlutaðra eigna hærra eða lægra en skattalegt bókfært verð þeirra, hjá þeim sem úthlutar, skal ákvarða hagnað eða tap eftir reglum tekjuskattslaga um söluhagnað áður en úthlutun fer fram. Hið sama eigi við um úttekt eigenda þar sem ekki er formleg ákvörðun um úthlutun.“

Eins og áður segir er þessi tiltekna breyting sem birtist hér í 1. gr. lögð til til að bregðast við nýlegum úrskurði yfirskattanefndar þar sem reyndi á skattaleg úrlausnarefni þegar verið var að slíta íslensku félagi sem var 23,15% eigandi að félagi skráðu á Cayman-eyjum en átti móðurfélag í Lúxemborg. Það stóð til að slíta íslenska félaginu með greiðslu til Lúxemborgar-félagsins í formi hlutar í Cayman-félaginu og ríkisskattstjóri lét í té bindandi álit þar sem fram kom að líta bæri á afhendingu hlutarins sem sölu þannig að það ætti að ákvarða íslenska félaginu skattskyldan söluhagnað. En yfirskattanefnd komst að annarri niðurstöðu, komst að þeirri niðurstöðu að ekki bæri að líta á þessa úthlutun sem sölu í skattalegu tilliti sem hefði í för með sér skattlagningu söluhagnaðar í hendi íslenska félagsins. Þarna var í raun verið að snúa við viðtekinni túlkun og framkvæmd skattsins og niðurstaða yfirskattanefndar gæti að öðru óbreyttu gert það að verkum að ríkið verði af skatttekjum við slit á félögum og úthlutun eigna þeirra til hluthafa.

Með þessu frumvarpi er lagt til að kveðið verði á um það með mjög afgerandi hætti í 21. gr. tekjuskattslaga, sem fjallar um söluhagnað, að fari greiðsla fram með eign atvinnurekstrar skuli ákvarða hagnað eða tap með sama hætti og ef eignin hefði verið seld ótengdum aðila, þar með talið við úttekt eiganda.

Ef við víkjum þá að 2. gr. þessa frumvarps þá varðar sú breyting fyrningarálag á stofnverð eigna sem teljast umhverfisvænar og stuðla að sjálfbærri þróun. Við leggjum til að vísunin „skv. 1. mgr.“ verði sett þarna inn, en hún var fyrir mistök felld út úr frumvarpstexta í meðförum þingsins á 151. löggjafarþingi, sbr. þingskjal 1172, 399. mál. Með vísuninni er áréttað að fyrningarálag sem kveðið er á um í 2. mgr. ákvæðis til bráðabirgða LXX taki til sömu eigna og 1. mgr. nær til, þ.e. lausafjár skv. 1. tölul. 33. gr. laganna og nái þannig ekki til annarra eigna. Þá er lagt til að niðurlagsorð 8. mgr. verði felld brott en þau eru óþörf eftir breytingar sem gerðar voru á 7. mgr. greinarinnar í meðförum þingsins þegar skilyrðið um að skattaðili teldist ekki vera í fjárhagsvanda var tekið út.

Að þessu sögðu leggur efnahags- og viðskiptanefnd til að málið gangi til 2. umr.