kosningalög.

Hæstv. forseti. Ég ætlaði bara að bæta því við að breytingar á kosningalögum og kjördæmafyrirkomulagi hafa átt sér stað svona nokkurn veginn á 20–30 ára fresti síðustu öldina. Ef horft er á það þá gætum við ímyndað okkur að það væri kominn tími á breytingar núna. Þessar stóru breytingar sem hafa átt sér stað, 1999, 1987, 1959, 1942, hafa verið svona með ákveðnum takti og ég held að það sé alveg tilefni til að skoða það.

Ég ætla hins vegar að nefna það af því að hv. þingmaður vék að stjórnarskránni, að allar þessar breytingar í fortíðinni hafa gerst með stjórnarskrárbreytingu og það hefur auðvitað verið hægt að gera breytingar á stjórnarskránni hvað þetta varðar svo fremi sem menn séu ekki að reyna að blanda öllum ákvæðum stjórnarskrárinnar inn í eða bæta fullt af nýjum ákvæðum við. Þannig að ég myndi ekki útiloka það, eins og mér fannst hv. þingmaður gera í ræðu sinni hér áðan, að afmörkuð stjórnarskrárbreyting að þessu leyti gæti náð einhverri niðurstöðu og þá gætum við verið að tala um frekari uppstokkun kerfisins en þetta frumvarp gerir ráð fyrir.

Ég átta mig á því að það er auðvitað markmið eða nálgun flutningsmanna frumvarpsins að leggja hér til breytingar sem hægt er að ná fram án þess að fara í allt það viðamikla ferli sem tengist stjórnarskrárbreytingum. Og það er vissulega hægt að gera. En eins og við þekkjum þá hefur núverandi kjördæmaskipan með þeim sex kjördæmum sem um er að ræða og það fyrirkomulag allt saman kannski aldrei verið óumdeilt þannig að það má skoða það líka. En það á hins vegar ekki að hindra okkur í því að reyna að lagfæra hlutina innan þess ramma sem við störfum núna. Ég held að það sé bara vert umræðuefni og þakka hv. þingmanni fyrir að færa þetta mál inn í þingið.