Fjármögnun heilsugæslustöðva á höfuðborgarsvæðinu.

Hæstv. forseti. Ég vil þakka þessa umræðu sem fram fer hér í dag. Mikið hefur verið rætt um stöðu heilsugæslunnar á síðustu vikum og það er áhyggjuefni hvernig starfsemi hennar er að þróast og heilbrigðiskerfisins alls í heild. Í könnun sem Sjúkratryggingar Íslands stóðu fyrir kom fram að 72,3% einstaklinga bera mikið traust til heilsugæslunnar á höfuðborgarsvæðinu. Það má leiða líkur að því að niðurstöður sem þar birtust líka bendi til þess að einkareknar heilsugæslustöðvar njóti mests trausts hjá notendum. Nú er svo komið að einkareknar heilsugæslustöðvar geta ekki staðið undir rekstrinum lengur. Gunnlaugur Sigurjónsson, stjórnarformaður Heilsugæslunnar Höfða, var gestur í Dagmálum fyrir stuttu og sagði að lífsnauðsynlegt væri að veitt yrði aukið fjármagn til reksturs stöðvanna. Ef ekkert yrði gert færu þær í þrot. Gunnlaugur sagði einnig að ef ríkið brygðist ekki við myndu stöðvarnar neyðast til að senda helming lækna sinna í ólaunað leyfi fram að áramótum eða fram að næsta fjárlagaári. Ég leyfi mér að efast stórlega um að ríkið geti tekið að sér alla þá íbúa sem nýta sér þjónustu einkarekinna heilsugæslustöðva á höfuðborgarsvæðinu.

Hæstv. ráðherra. Málið er alvarlegt. Fjöldi fólks hefur á síðustu misserum yfirgefið opinbera heilbrigðiskerfið og fært sig yfir í það einkarekna og það segir ýmislegt.