sala Íslandsbanka.
Herra forseti. Ég þakka hv. þingmanni fyrirspurnina. Ég vil byrja á að segja að ég held að það skipti miklu máli sem hún nefndi í upphafi síns máls, þ.e. hvernig við hugum að trausti á fjármálakerfið en ekki síður trausti á stjórnsýsluna og stjórnmálin. Það er mikilvægt. Í þeirri skýrslu sem nú hefur verið birt kemur fram gagnrýni, bent er á annmarka á sölu á þessum hlut í Íslandsbanka, sem við eigum að taka alvarlega. Við eigum að taka þessa gagnrýni alvarlega og við eigum að bregðast við henni. Þar hygg ég að við séum í öllu falli mörg hver sammála hér á þinginu.
Ég vil þó segja nokkuð um þá þætti sem hv. þingmaður nefnir. Hv. þingmaður spyr: Átti ekki hæstv. fjármálaráðherra að tryggja hæsta verð fyrir hlutinn? Við megum ekki gleyma því að í þeirri greinargerð sem skilað var til þingnefnda var sérstaklega kveðið á um að hæsta verð væri ekki eina markmiðið með þessari sölu. Einnig bæri að tryggja heilbrigt, dreift og fjölbreytt eignarhald. Ekki er hægt að gera því skóna að það markmið hafi komið fram síðar þar sem þetta var reifað og þetta var líka reifað af hálfu þingnefndanna. Þar var líka rætt um þann afslátt sem var gefinn af verðinu og kom m.a. fram í áliti einhvers minni hlutans, í umræðu um þetta, og um þetta var spurt á vettvangi þingsins. Ég held að við getum ekki horft fram hjá því í fyrsta lagi að eignarhaldið átti að vera dreift og fjölbreytt. Það var eitt af markmiðum sölunnar. Verðið hefði getað verið hærra eins og bent er á og upplýsingarnar sem lagðar voru fram voru ekki fullnægjandi. Mér finnst það reyndar alvarlegt mál, en hér er um að ræða þá fagstofnun ríkisins sem á að sjá um eignarhald og sölu á hlutum ríkisins í fjármálafyrirtækjum. Henni er ætlað að tryggja ákveðna armslengd frá stjórnmálunum þegar ákvarðanir eru teknar.
Varð ég fyrir vonbrigðum með þessa framkvæmd? Já, (Forseti hringir.) það er margt í þessari skýrslu sem veldur mér verulegum vonbrigðum með framkvæmdina og mér finnst hún sýna að rík ástæða sé til að endurskoða (Forseti hringir.) allt þetta fyrirkomulag frá grunni eins og ég sagði hér í vor.
