Fjölþáttaógnir og netöryggismál.

Frú forseti. Ég vil byrja á því að þakka málshefjanda fyrir þessa umræðu og hæstv. forsætisráðherra fyrir sín svör. Alþjóðavæðing, stöðugt netsamband og gervigreind í stafrænum heimi hafa veitt okkur lífsgæði og tækifæri sem engan hefði dreymt um fyrir tveimur áratugum. Þessum breytingum hafa einnig fylgt áskoranir sem nauðsynlegt er að bregðast við og varða þjóðaröryggi. Líkt og Víðir Reynisson, yfirlögregluþjónn hjá almannavörnum, benti á í umfjöllun Kveiks nýlega eru fjölþáttaógnir raunverulegt verkefni almannavarna. Fjölþáttaógnir eru ný tegund stríðsreksturs, raunveruleg ógn við öryggi Íslands sem getur valdið gríðarmiklum skaða. Hvort sem um er að ræða netárásir á kerfislega mikilvæga innviði, svo sem fjarskipta- og orkukerfi, markvissar árásir á lýðræðislega ferla og stofnanir samfélagsins eða árásir á vefi þeirra fyrirtækja sem dreifa upplýsingum sem ekki eru stríðsherrum þóknanlegar er ljóst að þær myndu veikja þjóðfélagið verulega og jafnvel lama starfsemi fyrirtækja og stofnana. Við höfum ýmsar leiðir til að takast á við þessar nýju ógnir. Mikilvægast er að nýta tæknina sem við höfum sannarlega aðgang að, þá sérstaklega gervigreind og máltækni til að greina ógnir og bregðast við þeim áður en þær valda umtalsverðum skaða. Gervigreind er kjarninn í greiningu gagna og því besta leiðin til að greina ógnir og vernda kerfislega mikilvæga innviði. Það er ljóst að geta okkar til að nýta gervigreind í þágu þjóðaröryggis byggir á getu gervigreindar til að lesa og greina tungumálið íslensku. Máltækni á íslensku er því einn lykillinn að þjóðaröryggi í dag. Annars getum við ekki nýtt gervigreind gegn nýjum áskorunum.

Virðulegi forseti. Það þarf að horfa til stafræns sjálfstæðis Íslands í samhengi fjölþáttaógna