Fjölþáttaógnir og netöryggismál.

Virðulegur forseti. Þetta eru áhugaverðar umræður. Falsfréttir eru ekki nýtt fyrirbæri í heiminum. Falsfréttir urðu ekki til með internetinu en það er mjög mikilvægt að við náum að greina þær og höldum vörð þannig að falsfréttir fái ekki að dreifa sér. Varðandi sjálfstæði Íslands í netöryggismálum sem hér var minnst á er gríðarlega mikilvægt, og það hefur komið fram í fjölmiðlum, m.a. af prófessorum í hagfræði við Háskóla Íslands og ég veit að Seðlabankinn hefur skrifað skýrslur um það, að Ísland komi sér upp innlendri greiðslumiðlun. Það er gríðarlega mikilvægt og myndi líka spara Íslandi tugi milljarða króna á ársgrundvelli. Mannauður og menntun er gríðarlega mikilvæg þegar kemur að fjölþáttaógnum og netöryggi. En ég er hins vegar ekki að sjá það að í grunnskólum og skólum landsins sé verið að taka á þessu máli með nægilega öflugum hætti. Ég minntist í fyrri ræðu á Finna sem við ættum að taka okkur til fyrirmyndar varðandi falsfréttir og við ættum líka að gera það varðandi internetið og fleiri atriði upplýsingabyltingarinnar. Eistar hafa farið að fordæmi Finna hvað það varðar. Ég minntist í fyrri ræðu á aðild Íslands að evrópska öndvegissetrinu um fjölþáttaógnir en við höfum verið aðilar að því síðan 2017. Ég myndi gjarnan vilja fá að vita hver árangurinn af því starfi og þeirri aðild er, hvaða þekking hefur komið inn í landið. Mig langar einnig að minnast á stofnun sem er mjög mikilvæg og það er ENISA. Hvað er ENISA? Það er stofnun Evrópusambandsins um netöryggi, European Agency for Cyber Security. Ísland þarf að taka virkan þátt í þeirri stofnun og þar er gríðarlega mikil þekking. Ég get talað fyrir eigin hönd því þegar ég var að vinna í þessum málum varðandi tilskipun Evrópusambandsins um netöryggi og öryggi upplýsingakerfa þá var mjög mikið horft á upplýsingar sem komu frá ENISA. (Forseti hringir.) Ísland þarf að taka miklu virkari þátt í alþjóðasamstarfi hvað þetta varðar. Það er einungis þannig sem við getum fengið aukna þekkingu inn í landið.