Störf þingsins.
Virðulegi forseti. Þjóðin hefur verið uggandi síðustu daga yfir atburðum síðustu helgar þar sem ráðist var á menn inni á skemmtistað með hrottalegum hætti. Því miður sjáum við þess merki að ofbeldi á meðal ungs fólks virðist fara vaxandi, sér í lagi hjá ungum karlmönnum sem beita einnig vopnum. Við verðum að spyrja okkur af hverju við færumst í þessa átt. Hvað er það í samfélagsgerðinni okkar sem veldur því að ungir menn valda sjálfum sér og öðrum skaða? Það hefur verið nefnt að hér sé vaxin úr grasi kynslóð ungra manna sem upplifir sig utangátta í samfélagi okkar og eigi erfitt með að finna sér tilgang í lífinu. Við vitum að vandi drengja er mikill í skólakerfinu okkar. Við erum búin að vita í mörg ár að eftir grunnskólagöngu eru rúmlega 34% drengja sem geta ekki lesið sér til gagns. Þetta er tvöfalt hærra hlutfall en hjá stúlkum. Hér á landi eru drengirnir okkar á eftir stúlkum í öllum PISA-mælingum. Við getum haldið áfram upptalningunni. Árangur drengs sem byrjar í grunnskóla mun versna alla grunnskólagöngu hans. Af öllum Vesturlöndum eru minnstar líkur á að íslenskir drengir ljúki háskólanámi. Ísland er með eitt mesta brottfall drengja úr framhaldsskólum á Vesturlöndum. Hér á landi er lægsta hlutfall drengja í háskólum af öllum OECD-löndunum. Á síðustu tíu árum jókst hlutfall 18–29 ára karlmanna á örorku um 74%. Langstærsti hluti þeirra sem fyrirfara sér á Íslandi eru karlar. Við verðum að bregðast við og taka betur utan um drengina okkar. Við höfum séð viðvörunarljós blikka í mörg ár og nú getum við ekki beðið lengur. Það vantar aðgerðaáætlun varðandi drengina okkar. Við verðum að bregðast við.
