þjóðaröryggisstefna fyrir Ísland.
Virðulegi forseti. Ég vil taka heils hugar undir með hv. þingmanni að það er erfitt fyrir okkur að segja skýrt og skorinort að við ætlum að fara upp í 2% af landsframleiðslu. Ég held að það sé ekki raunhæft eins og staðan er í dag og alls ekki miðað við stöðu ríkisfjármála þannig að það er snúið. Á hinn bóginn þurfum við í þessu eins og öðru að horfa til framtíðar og ég vil í fyrsta lagi segja að við þurfum að leggja aukna áherslu á að byggja upp þekkingu hér innan lands á öryggis- og varnarmálum, meira en verið hefur. Í öðru lagi einmitt að skoða leit og björgun. Það er eitthvað sem við getum raunverulega gert sjálf og stuðlað að og verið okkar framlag, og um leið að fjölga enn frekar í borgarahluta starfseminnar í NATO. Þar sem við höfum komið inn höfum við gert það alveg ótrúlega vel, hvort sem það er flugumsjón eða aðrir þættir, ráðgjöf varðandi björgun og fleira. Það er eitthvað sem við getum tvímælalaust bætt. Í þriðja lagi er það okkar aðstaða hér, hvernig við ætlum að byggja upp aðstöðu, m.a. líka í samvinnu við mannvirkjasjóð Atlantshafsbandalagsins. Ég tel að við þurfum að halda áfram uppbyggingu sem hefur átt sér stað. Það hefur verið uppbygging á síðustu árum sem er fagnaðarefni og við verðum að búa þannig um hnútana að hún geti haldið áfram í þessu breytta umhverfi og að við getum gripið til þeirra aðgerða hverju sinni og við séum með þannig aðbúnað að við getum gert það ef svo ber undir. Ég ætla einfaldlega að leyfa mér að skilja að það er ekki hægt, verandi með hæstv. forsætisráðherra í salnum, fyrir stjórnarþingmenn að koma hér og taka undir orð Björns Bjarnasonar um að stíga þurfi ákveðnar til jarðar í þessum málum. Hv. þingmaður talar um að við þurfum að taka þetta alvarlega. Ég tek heils hugar undir það og ég vona og ég veit að við munum gera það mjög ítarlega, að taka þetta alvarlega í utanríkismálanefnd.
