útgjaldaukning ríkissjóðs.

Virðulegi forseti. Það er út af fyrir sig rétt að útgjaldaaukning ríkissjóðs á undanförnum árum hefur verið töluverð og þeir fjármunir sem við höfum verið að bæta í á útgjaldahliðinni hafa mest verið að fara í stóru kerfin okkar, eins og í heilbrigðiskerfið, í almannatryggingar, veruleg hækkun núna í bætur ellilífeyrisþega og öryrkja á næsta ári borið saman við síðustu fjárlög. Þetta gerum við vegna þess að það er verðbólga í landinu. Ef við skoðum hins vegar afkomuna hjá okkur þá erum við að gera betur en við gerðum ráð fyrir þegar fjármálaáætlun var lögð fram hér síðastliðið vor þar sem við gerðum ráð fyrir um 50 milljarða halla á frumjöfnuði. Við erum með umtalsvert betri afkomu frumjafnaðar, jafnvel eftir þessa útgjaldaaukningu, vegna þess að hagvöxturinn í ár er að skila okkur meiri tekjum. Ég held að það sé alveg óhætt að segja að við getum ekki gengið mikið lengra í útgjaldavextinum heldur en er verið að gera hér án þess að það fari að hafa slæm áhrif á hagkerfið, sérstaklega þegar hagkerfið er við jafn mikið spennustig og er í dag. Það birtist okkur t.d. í mjög mikilli einkaneyslu. Við þurfum að leggjast mjög vel yfir það núna í aðdraganda þess að sett verður ný fjármálaáætlun hvað við getum gert til að draga úr spennunni, hvernig við getum stillt betur saman strengi með vinnumarkaðnum. Allt ætti það að vera hugsað til þess að ná aftur niður verðbólgunni og þar með vaxtastiginu. Ég held hins vegar að þegar skoðað er í hvað ný útgjöld eru að fara þá séum við flest sammála um að þar er verið að verja mikilvæg kerfi eins og hv. þingmaður vill gjarnan tala um; ellilífeyri.