Fríverslunarsamtök Evrópu og Evrópska efnahagssvæðið 2022.
Virðulegur forseti. Ég vil þakka hv. þm. Ingibjörgu Isaksen fyrir framsöguna. Það vekur helst athygli mína, og er kannski skylt því sem ég hef spurt aðra um hér í kvöld og helgast kannski af því hvar hugurinn er akkúrat núna, að það er ítrekað rætt um að fríverslunarsamningur EFTA við Úkraínu sé í endurskoðun en hins vegar kemur ekkert fram um framgang þess máls, nema á einum stað er sagt að það sé fyrirhugað að auka gagnsæi um framgang þessarar endurskoðunar. Kannski sérstaklega í ljósi þess að maður finnur þá skemmtilegu staðreynd á netinu að þessi fríverslunarsamningur var undirritaður í Reykjavík 24. júní 2010 þá stendur þetta okkur pínu nærri að þessu leyti og að sjálfsögðu líka sem aðilar að þessu samstarfi og líka í ljósi krísunnar sem er þarna uppi. Ég er pínu forvitinn um hvernig þessi endurskoðun gengur og tímarammann á henni og svo kannski líka hvað hún skiptir miklu máli, hvort þessi opnun hjá Evrópusambandinu sé nóg eða hvort þetta sé atriði sem er mikilvægt fyrir Úkraínubúa sjálfa.
