Störf þingsins.

Virðulegur forseti. Þær ánægjulegu fréttir bárust í dag að þess væri að vænta að loðnukvóti þessarar vertíðar yrði aukinn um 100.000 tonn. Það þýðir meiri vinnu á þeim stöðum þar sem uppsjávarfiski er landað; Þórshöfn, Vopnafirði, Neskaupstað, Eskifirði, Fáskrúðsfirði, Höfn og auðvitað Vestmannaeyjum. Það þýðir meiri verðmæti fyrir þjóðarbúið en ætla má að takist að veiða þessi 100.000 tonn sé þarna um að ræða útflutningsverðmæti fyrir 7–10 milljarða kr. Það er ekkert gefið í því en ég hef fulla trú á því að það verði allt kapp lagt á nákvæmlega það sem leiðir til aukinna tekna fyrir byggðirnar, fyrirtækin, sjómennina og landverkafólkið. Ár loðnuleysis voru fyrrgreindum sjávarplássum afar dýr. Miðað við greiningu sem unnin var fyrir Samtök sjávarútvegssveitarfélaga árið 2019 var tekjumissirinn 4,5–6,7% af skatttekjum og tekjum hafnarsjóða. Það var mikið högg fyrir þessi samfélög og þannig eru það geysilega jákvæðar fréttir að fá þessa búbót. Áhrifin á ríkissjóð eru umtalsverð vegna meiri útsvarstekna, veiðigjalda og fleira. Loðnan er einn okkar verðmætasti nytjastofn og munar um það þegar ráðgjöfin eykst um tugi prósenta.

Virðulegur forseti. Til þess að við getum nýtt auðlindir sjávar á sem skynsamlegastan hátt þarf að stunda öflugar hafrannsóknir. Breytinga er að vænta í hafinu vegna loftslagsbreytinga og þær þurfum við að skilja. Vísindaleg ráðgjöf er til grundvallar ákvörðunum um leyfilegan heildarafla og þess vegna er Hafrannsóknastofnun einfaldlega kerfislega mikilvæg stofnun í okkar efnahagslífi. Því þarf að búa þannig um hnútana að stofnunin geti sinnt sínum verkefnum, t.d. að finna 10 milljarða útflutningstekjur syndandi við Norðurland, og öðrum grunnrannsóknum með markvissum hætti.