Störf þingsins.

Herra forseti. Á opnum fundi efnahags- og viðskiptanefndar í gær sagði seðlabankastjóri að með evru yrði verðbólga hér miklu hærri. Þetta er stór fullyrðing. Fullyrðing sem ber þess merki að hér sé vísvitandi litið fram hjá því að með evru væri engin verðtrygging, nokkuð sem nú dregur úr áhrifum stýrivaxta á verðbólgu. Og litið fram hjá því að með evru gætu ríkisstjórnin og hæstv. fjármálaráðherra ekki leyft sér sömu vettlingatök í ríkisrekstrinum. Og litið fram hjá því að með evru væru önnur vandamál, t.d. tengd miklum sveiflum á gengi, úr sögunni. Með öðrum orðum, það er hægt að henda því fram að með evru væri verðbólga hér á landi enn hærri en hún er ef litið er fram hjá raunveruleikanum. Ég staldraði líka við þau orð seðlabankastjóra að við værum ívið lægri á verðbólgurófinu en aðrar Evrópuþjóðir og að Eystrasaltslöndin væru með 20% verðbólgu eða meira. Staðreyndin er sú að nær öll Evrópuríkin eru með lægri verðbólgu en Ísland og þar er hún í þokkabót á niðurleið. Svo er ekki hér. Eystrasaltslöndin eru vissulega í fámennum hópi ríkja með jafn háa eða hærri verðbólgu en hér. Þau eru ríki sem voru með mikil orku- og viðskiptatengsl við Rússland fyrir innrásina í Úkraínu og hafa styrkt Úkraínu fjárhagslega í baráttunni svo langt umfram getu að mér þykir afar sérkennileg pólitík að draga þau sérstaklega inn í krónuvörnina á þessum tímum. Staðreyndin er sú að krónan er fyrst og fremst ágætt tæki til að leysa þann vanda sem krónan sjálf skapar. Sú endalausa rússíbanareið sem af því leiðir er einfaldlega of kostnaðarsöm fyrir samfélagið okkar.

Herra forseti: Okkur er öllum orðið óglatt í þessum rússíbana.