rafbyssuvæðing lögreglunnar.

Forseti. Rétt fyrir áramótin undirritaði dómsmálaráðherra reglugerð um rafbyssuvæðingu lögreglunnar eftir að hafa sagt þann sama dag að hefja ætti innleiðingu málsins. Sama dag sagði forsætisráðherra að ræða þyrfti málið í ríkisstjórn og á þingi. Ég vil því fyrst spyrja dómsmálaráðherra: Hvenær lét hann forsætisráðherra vita að reglugerðin hefði þegar verið undirrituð? Var það fyrir eða eftir að forsætisráðherra sagði að það þyrfti að ræða málið betur?

Önnur spurning: Í nýlegri tilkynningu umboðsmanns Alþingis segir að reglur stjórnarskrár og laga um Stjórnarráð Íslands miði að því að tryggja viðhlítandi samstarf og samvinnu milli ráðherra þannig að ríkisstjórnin starfi samhent að stefnumálum sínum. Láti ráðherra farast fyrir að virða þessar reglur feli það ekki eingöngu í sér brot á formreglu heldur stuðli slík háttsemi að því að það pólitíska samráð sem lög og stjórnarskrá mælir fyrir að skuli fara fram á vettvangi ríkisstjórnarinnar sé sniðgengið.

Það felur ekki eingöngu í sér brot á formreglum, segir umboðsmaður, heldur sniðgengur líka pólitískt samráð, að ganga fram með þeim hætti sem dómsmálaráðherra hefur gert í þessu máli. Ég vil því spyrja dómsmálaráðherra: Telur hann það virkilega vera fullnægjandi málsvörn og útskýringu að lýsa sig einfaldlega ósammála umboðsmanni? Svo að ég vitni til bréfs umboðsmanns, með leyfi forseta:

„Tel ég að hér sé þar af leiðandi um að ræða atriði sem hefur þýðingu fyrir það traust sem borgararnir eiga að geta borið til þess að æðsta stjórn landsins vinni mál og afgreiði af fagmennsku og yfirvegun.“

Finnst ráðherra þetta í alvörunni ekki vera alvarlegt mál, mikilvæg áherslubreyting, mikilvægt stjórnarmálefni? Finnst ráðherra skoðun forsætisráðherra og niðurstaða umboðsmanns ekki skipta neinu máli?