afhending gagna varðandi ríkisborgararétt.
Virðulegi forseti. Það væri nú óskandi að það væri fjallað um mál sem varða lög um ríkisborgararétt af meiri yfirvegun hérna á Alþingi. Auðvitað hlýtur það að vera grundvallaratriði að í lögunum sé fyrst og fremst greint frá þeim skilyrðum sem þurfa að vera uppfyllt lögum samkvæmt til að fólk eigi rétt á því að fá jákvæða afgreiðslu á beiðni um íslenskt ríkisfang. En einhverra hluta vegna hafa mál þróast þannig að Alþingi er komið með óeðlilegan áhuga á því að fá sem flestar beiðnir til sín til sérstakrar meðhöndlunar, til þess að Alþingi geti, auk þess sem segir í lögunum, fengið sem allra flest mál til að afgreiða sem ekki hafa uppfyllt skilyrði laganna. Þetta verð ég að segja að er alveg sérstaklega sérstakt.
Varðandi það sem er hér verið að ræða um þá dugar lítið fyrir þingmenn að tala svona fjálglega um rétt sinn til upplýsinga þegar þessir sömu þingmenn vita að stofnunin sem í hlut á er ekki með gögnin tilbúin fyrir þingið. Þetta snýst ekki um það að (Forseti hringir.) gögnin séu öll tilbúin í því formi sem þingið vill og menn séu bara hreinlega að neita þinginu um aðgengi að gögnunum. Málin eru bara svo mörg að það er ekki komið að því að (Forseti hringir.) gögnin séu tilbúin fyrir þingið þegar þingið vill fá þau afhent. Má maður bara biðja um það að það sé rætt um jafn alvarleg og mikilvæg mál eins og rétt Alþingis til upplýsinga annars vegar (Forseti hringir.) og réttinn til að fá afgreiðslu á sínum beiðnum um ríkisfang hins vegar af einhverri yfirvegun og skynsemi hérna í þinginu?
