aðgerðaáætlun í geðheilbrigðismálum fyrir árin 2023-2027.

Hæstv. forseti. Ég vildi bara koma hér örstutt og þakka fyrir góðar ræður og góða umræðu um þessa aðgerðaáætlun í geðheilbrigðismálum. Það sem hefur komið fram hér í ræðum og skal viðurkennt er að við þurfum að gera miklu betur í þessum málaflokki — kannski höfum við gert allt of lítið allt of lengi, það kom glögglega fram í ræðum hv. þingmanna hér — og því þarf auðvitað að fylgja fjármögnun, eins og var dregið fram í umræðum og kom berlega í ljós í skýrslu Ríkisendurskoðunar þegar síðasta áætlun var tekin saman um hvernig við fylgjum eftir þeim aðgerðum. Þó að maður megi aldrei missa trúna á það sem þó er vel gert og það sem þó náðist fram þá verðum við að gera betur. Það skal bara viðurkennt.

Mig langar líka að draga fram hér og árétta, af því að þó nokkuð var rætt um fjármögnunina, eðlilega, og kostnaðarmat sem þarf að fylgja, að ég er sammála því og bæði breiður starfshópur og ráðuneytið lögðu mat á einstakar aðgerðir. Ég vil hér nota tækifærið og draga fram þær sex aðgerðir sem eru fjármagnaðar á þessu ári og eru komnar í gang.

Það er 1.A.4, skólaheilsugæslan, en þar eru 96 millj. kr. árlega næstu þrjú árin.

Það er 3.A.1, að stofna geðráð, það er innan fjárheimilda. Það er kannski bæði forvarnaáherslan og þetta geðráð sem ég bind miklar vonir við og er mjög í takt við þessa notendamiðuðu hugsun sem til að mynda önnur Norðurlönd eru að fara í og mikið var rædd á ráðherranefndarfundi Norðurlandanna um geðheilbrigðismál í síðustu viku.

2.C.1, að verkefnishópur skilgreini hlutverk og verkefni veitenda geðheilbrigðisþjónustu, greini samvinnu, samfellu og skort þar á. Sú aðgerð er komin af stað.

3.C.1, að framtíðarsýn verði mótuð og þarfagreining gerð vegna húsnæðis geðþjónustu Landspítala. Það liggur alveg fyrir og hluti af þeim hópi sem vann að þessari áætlun er búinn að taka saman ágætisskýrslu sem fer til rýni hjá NLSH-stýrihópi og NLSH ohf. Það liggur alveg fyrir að húsnæði við Klepp og Hringbraut er ekki hugsað til framtíðar og þar kemur auðvitað stór fjármögnunarliður inn til viðbótar við þessa aðgerðaáætlun sem er hér þegar kemur að því að meta þá framkvæmd og hvernig hún þurfi að líta út.

4.A.2, að þróa stuðning við geðheilsuteymi heilsugæslunnar og finna leiðir til að auka og jafna aðgengi.

3.B.4, að gagnreynd starfsendurhæfingarúrræði verði efld. Þarna er þegar virkt samstarf við félags- og vinnumarkaðsráðuneyti um framkvæmd aðgerða og í samvinnu við sameiginlega stofnað endurhæfingarráð sem ég tel að sé mjög til bóta. Þannig að það er fjölmargt komið í gang.

Ég vildi hér að lokum þakka umræðuna. Ég veit að þetta mál fær góða umfjöllun í hv. velferðarnefnd. Ég þakka líka þeim öfluga samráðshópi sem vann þessa aðgerðaáætlun með fulltrúum í ráðuneytinu. Á bls. 8 í greinargerð er farið yfir þennan hóp og ég tel að sú nálgun, þessi breiða nálgun, þetta breiða samráð í undirbúningi þessarar aðgerðaáætlunar, sé jafnframt styrkurinn í þessari framsetningu. Það er eins og einn hv. þingmaður komst að orði hér í ræðu; það er auðvelt að setja fram hugmyndirnar en svo er auðvitað vinnan eftir, að fylgja þeim eftir og fjármagna næstu árin.