Störf þingsins.

Virðulegur forseti. Málefni héraðsskjalasafna, nánar tiltekið Borgarskjalasafns, hafa verið fyrirferðarmikil í umræðunni undanfarið. Þetta mál er allt hið furðulegasta. Hvernig meiri hluti borgarstjórnar Reykjavíkur getur nær umræðulaust lagt niður Borgarskjalasafnið og allt það starf sem þar er unnið er mér fyrirmunað að skilja, og það á grundvelli skýrslu frá einu endurskoðunarfyrirtæki. Tölurnar sem hafa verið nefndar í þessu samhengi, ýmist sem kostnaður borgarbúa við áframhaldandi rekstur skjalasafnsins í núverandi mynd nú eða þær milljónir sem kynnu að sparast við sameiningu þess við Þjóðskjalasafn Íslands, eru bara hluti upplýsingaóreiðunnar sem fylgir þessari ákvörðun meiri hlutans í borginni.

En enn síður skil ég þessa ákvörðun með tilliti til óumdeilds mikilvægis skjalasafna í upplýstu lýðræðissamfélagi. Fræða- og vísindafólk innan hug- og félagsvísinda, sem hefur tjáð sig í þessari umræðu, hefur bent á hversu vanhugsuð þessi ákvörðun er og hversu freklega er vegið að þeim sem treysta á skjalasöfn í rannsóknum sínum. Skjalasöfn eru útverðir upplýsinga og lýðræðis. Eðlilegt aðgengi að upplýsingum dregur úr spillingu í hvaða formi sem er. Ég held þetta sé okkur öllum ljóst.

Mér þætti því vænt um að heyra rökstuðning þingmanna, t.d. Pírata og Samfylkingar, fyrir þessari ákvörðun kollega þeirra í meiri hluta borgarstjórnar. Styður þessi ákvörðun á einhvern hátt hugsjónir og grunngildi þessara stjórnmálaflokka sem gefa sig út fyrir, eins og ég hef skilið það, upplýsta umræðu og lýðræðisleg vinnubrögð?