Störf þingsins.

Hæstv. forseti. Varða, rannsóknastofnun vinnumarkaðarins, var að gera grein fyrir niðurstöðum nýrrar könnunar sem gerð var meðal félagsmanna ASÍ og BSRB. Því miður koma niðurstöður þessarar könnunar ekkert sérstaklega mikið á óvart, en þær draga upp dökka mynd af stöðu efnaminnstu fjölskyldnanna á Íslandi. Það sem þær segja okkur líka er að staða þessara hópa fer ekki batnandi heldur fer hún versnandi. Það er í samræmi við niðurstöður kjarakannana sem Efling hefur gert og í samræmi við skýrslu sem Barnaheill birtu síðastliðið haust um stöðu barna og fátækt barna á Íslandi.

Hvað er hér um að tefla, hæstv. forseti? Af þeim sem svara segist tæplega helmingur eiga erfitt með að ná endum saman. Fjárhagsstaða kvenna er verri en karla á öllum mælikvörðum sem prófaðir eru. Fjárhagsstaða einstæðra foreldra er verst meðal vinnandi fólks. Fjárhagsstaða einstæðra mæðra er verri en fjárhagsstaða einstæðra feðra. Þriðja árið í röð mælist staða innflytjenda mun verri en innfæddra Íslendinga. Vinnandi fólk, fullvinnandi fólk á lágum launum, getur ekki greitt leiguna sína, á í miklum erfiðleikum með óvænt útgjöld, getur ekki mætt útgjöldum upp á nokkra tugi þúsunda. Og á meðan við erum að taka þessa punktmælingu, ef svo má að orði komast, í febrúar og mars á þessu ári, þá er verðbólgan enn að mælast 10%. Lágvaxtaskeiðinu svokallaða er löngu lokið og ríkisstjórnin er algerlega verklaus.