stjórn fiskveiða.
Herra forseti. Eins og hv. þm. Bjarkey Olsen Gunnarsdóttir kom inn á, framsögumaður nefndarálitsins, hefur nefndin haft þetta mál til skoðunar og það hafa heyrst mismunandi sjónarmið um ágæti eða ókosti þess að hafa tegundatilfærslu eða þann sveigjanleika sem er í kerfinu. Til að byrja með vil ég taka fram að sú niðurstaða sem nefndin náði er allágæt og ég er með á nefndarálitinu og styð því að málið verði samþykkt eins og það kemur frá nefndinni og sérstaklega þá með breytingartillögunni sem nefndin setur fram.
Ég vil gjarnan nota tækifærið og reifa hér ákveðið sjónarmið sem ég tel að sé mikilvægt að halda til haga í þessari umræðu. Það snýr að hagsmunum og stöðu Íslands í samningum við önnur ríki sem við eigum í viðræðum við út af nýtingu deilistofna. Það er rétt sem kemur hér fram í máli hv. þm. Bjarkeyjar Olsen Gunnarsdóttur að eitt er grálúða og gullkarfi og enginn sérstakur ágreiningur meðal umsagnaraðila um þann þátt málsins. Þetta snýr frekar að kolmunnanum, makrílnum og síldinni og síðan vinaþjóðum okkar í austri, ef svo má segja, þar sem það er ósamið um hver okkar skuldbinding er, Íslands, nákvæmlega. Því eru uppi skiptar skoðanir um hversu langt eigi að ganga í að draga úr sveigjanleika Íslands til að nýta þá heimild eða gera réttmæta kröfu um það hver hlutdeild Íslands eigi að vera í þessum deilistofnum. Það kann að vera að talan 15% sé engin heilög tala, sem er alls kostar rétt. Þetta eru ólík sjónarmið sem vegast hérna á og auðvitað komu fram athugasemdir um að þetta ætti að vera hærra. Það byggist á því að eðli þessara veiða úr deilistofnum á úthafinu er þannig að því meiri sveigjanleiki sem er, því betra, augljóslega vegna þess að það getur verið óvissa um framgang veiðanna og aðstæður í hafi geta verið svo breytilegar á milli ára. Þetta segir sagan okkur og ástæða er til að ætla að svo verði áfram. Við verðum að hafa í huga að ef við göngum lengra í átt að því að takmarka þennan sveigjanleika getur það leitt til þess að samningsstaða Íslands gagnvart þessum vinaþjóðum okkar í austri versni sem því nemur. Þetta tel ég mikilvægt að hafa í huga því að þetta er grundvallaratriði í málinu að mínu mati. Því tel ég það vera afskaplega mikilvægt að á grunni þessa frumvarps, verði það að lögum, hafi hæstv. matvælaráðherra þau tæki og tól og samninganefnd Íslands hafi öll tæki og tól til að ná fram góðum samningum um réttmæta hlutdeild Íslands í veiðum á þeim deilistofnum sem standa út af.
