skerðingar í almannatryggingakerfinu.

Virðulegi forseti. Í fyrsta lagi er hér verið að spyrja út í lög um almannatryggingar sem heyra undir félagsmálaráðherra en í öðru lagi er afskaplega óljóst nákvæmlega hvað það er sem er verið að biðja mig um að svara. Hef ég upplýsingar um það á reiðum höndum frá félagsmálaráðuneytinu hvernig hækkunin skilaði sér til lífeyrisþega? Ég er ekki með þær hér með mér í þinginu. Við höfum hins vegar séð það í öllum úttektum á þróun lífskjara í landinu að staða ellilífeyrisþega hefur farið batnandi undanfarin ár. Fyrst hv. þingmaður gerir svo vel að vísa í Tekjusöguna, sem er frábær heimild um þróun lífskjara í landinu, þá er það sem mér þykir hvað merkilegast við upplýsingarnar í Tekjusögunni það að á sama tíma og við sjáum hvern árganginn á eftir öðrum koma með betri lífeyrisréttindi inn á eftirlaun þá hafa bæturnar á sama tíma verið að hækka. Þegar við skoðum hvað er á bak við auknar ráðstöfunartekjur ellilífeyrisþega ár frá ári undanfarinn áratug er það hvort tveggja það að lífeyristekjurnar eru sífellt að verða betri fyrir nýja árganga, sem er mjög jákvætt, en við höfum líka verið að gera breytingar á kerfunum sem styðja betur við þessa hópa. Ef það væri svo að við værum að beita skerðingum til þess að hrifsa af fólki ávinninginn af því að hafa sparað með lífeyrissparnaði væru ráðstöfunartekjurnar ekki að vaxa. Til að svara spurningunni þá er það þannig að Tekjusagan er að sýna ráðstöfunartekjur sem eru eftir skatta.