landbúnaðarstefna til ársins 2040.

Virðulegi forseti. Mig langar við þetta tilefni að þakka hv. atvinnuveganefnd fyrir vinnuna að því að ljúka við þessa þingsályktunartillögu til afgreiðslu fyrir Alþingi. Hér erum við í raun og veru að afgreiða í fyrsta skipti stefnumörkun til lengri tíma í þessari atvinnugrein sem er innlendur landbúnaður. Það er mjög mikilvægt upp á það að við höfum grundvöll bæði fyrir lagasetningu en líka fyrir samspili landbúnaðar við aðra stefnumótun stjórnvalda. Ég nefni sjálfbærni í nýtingu náttúruauðlinda, landnýtingu sem tekur mið af ástandi vistkerfa á hverjum tíma, verndun og eflingu líffræðilegrar fjölbreytni og síðast en ekki síst framleiðslu heilnæmra afurða, matvælaöryggi og svo fæðuöryggi, þannig að hér, ásamt áherslum í loftslagsmálum, erum við að leggja grunn, að mörgu leyti byggt á þeirri stefnumótun sem sómi er að að Alþingi fái tækifæri til að greiða atkvæði um hér.