breyting á ýmsum lögum vegna fjárlaga 2024.

Virðulegi forseti. Ég hef verið með þetta mál til skoðunar og er að vinna úr samantekt sem unnið hefur verið að í ráðuneytinu, skýrslu um þetta efni. Eitt af því sem kemur manni kannski aðeins á óvart í þessari vinnu er að þetta er kannski ekki jafn stórt vandamál fjárhagslega og maður hefði ætlað í tekjuskiptingu ríkis og sveitarfélaga. Ég er hins vegar þeirrar skoðunar að þetta sé ákveðið prinsippmál. Það er auðvitað prinsippmál að fólk sem þiggur þjónustu í sveitarfélagi, sendir börn sín í skóla o.s.frv., nýtur margvíslegrar þjónustu og hefur góð fjárráð heilt á litið, greiði einhverja skatta til sveitarfélagsins. Ég er með í bígerð að koma með tillögur til lagabreytinga þannig að það nái fram að ganga.

Varðandi fjármagnstekjuskattinn að öðru leyti þá er þetta skattur sem hefur verið hækkaður mjög verulega á undanförnum árum. Hann hefur farið úr 10% upp í 22% í tveimur skrefum. Íslenski fjármagnstekjuskatturinn var frá upphafi hugsaður sem skattur sem ætti að leggjast yfir mjög breiðan gjaldstofn. Þess vegna var honum í upphafi stillt svona tiltölulega í hóf. Þetta felur m.a. í sér að við tökum fjármagnstekjuskatt af verðbótum, þannig að nákvæmlega jafngildar krónur og voru á fyrra ári eru skattlagðar ári síðar. Það leiðir til þess að fólk er með neikvæða raunávöxtun ef ekkert annað kemur til. Þetta þarf að hafa í huga þegar menn eru að velta fyrir sér hækkun á fjármagnstekjuskattinum sérstaklega, þ.e. hversu breiður gjaldstofninn er.